Strákamamma

Betri tímar framundan!

2009-02-11T14:31:00.000-08:00

Hæ hæ! Er einhver þarna úti!! Ákvað að hressa upp á bloggið eftir langan tíma....

Það er allt gott að frétta af okkur, allir við ágætis heilsu 7, 9, 13 og allt það....
Ég veit að framundan eru góðir tímar...eftir smá erfiðleika!! Við stöndum þetta allt af okkur! Endilega senda mér línu og kíkja á facebookið mitt, maður er alltof lélegur að halda sambandi svo ég þigg útrétta hendi hehe!!!

Hafið það gott og hlakka til að sjá eða heyra frá ykkur!!!

Stress og bólur

2008-03-30T04:19:00.000-07:00

Komið þið blessuð og sæl!
Ég veit ég hef ekkert bloggað, alger fýlupúki. En já það hefur verið svolítið mikið að gerast um ekki neitt svo ég hef bara ekki nennt að setjast niður og skrifa um það. Ég er bara á fullu í skólanum og núna er ég að reyna að klára verkefni sem ég tók að mér utan skóla og er ekki alveg að brillera í því...kemur á óvart hehehe.
En ég leit óvart fram í tímann í dagbókinni minni og fattaði þá óvart að það eru bara 2 kennsluvikur eftir í skólanum...ég varð alveg bit. Hvert fór tíminn? Nú sér maður eftir skrópunum og eftir því að hafa dregið hitt og þetta verkefnið á eftir sér óklárað....stresslevelinn fer hækkandi, en ég verð að byrja á því að ljúka þessu utanskólarverkefni áður en ég get byrjað að hugsa um allt hitt. En ég vona að þið hafið það sem allra best. Ég er ein bóla þessa dagana, veit ekki hvort það er stressið eða páskaeggjiaátið!?? You go figure...hm. En ég set svo nokkrar skrappmyndir með sem ég er búin að vera að gera síðustu daga þegar ég átti að vera að læra, eitthvað þurfti ég að gera við dótið sem ég keypti mér á netinu í staðinn fyrir að vera að læra!!!

Þreyttur

2008-03-16T16:52:00.001-07:00

Guttarnir okkar á laugardaginn síðasta....:

Jæja þá er starfsþjálfuninni lokið og þá taka við verkefnin í skólanum og utan...og það situr ýmislegt á hakanum svo ég verð að fara að herða mig. Annars er allt bara nokkuð gott að frétta!

Eigið góða vinnuviku framundan!!!

Career woman-endurútgefinn vegna SPAM´s

2008-03-16T16:51:00.001-07:00

Career woman
Jæja þá er þessu blessaða starfsreynslutímabili loksins lokið...eða ætti að vera það. Ég átti að klára sjónvarpið á föstudaginn, en því miður var ég send heim áður en náðist að klippa verkefnið mitt. Nú þarf ég að mæta á hádegi á morgun...Ég lærði helling undanfarnar vikur, en það var líka hangið mikið. Svo er maður orðinn mjög þreyttur og líka eftir á í skólanum og öðrum verkefnum.En eitt gott kom út úr þessu, ég verð semsagt að vinna á dagblaði í sumar svo það verður góð reynsla. Mig hlakkar reyndar ekkert til að vera að vinna í sumar, ég fæ aldrei frí sem nemi og móðir og finnst svolítið svekkjandi að vera komin í sumarvinnu á þessum aldri!!! En kannski get ég kríað út langa helgi og freistað þess að fá pössun svo við getum farið í helgarferð ég og kallinn...en það er samt svekkjandi því þessum eldri finnst svo geggjað gaman á ströndinni og þess vegna langar mig að fara til sólarlanda með þá! Hver veit nema maður bóki bara eina sólarferð að hausti til??? Það gæti gengið....En annars er allt gott að frétta. Kjartan er á Akureyri að steggja vin sinn hann Smára sem er að fara að kvænast í apríl og kemur líklega heim slæptur og þreyttur í kvöld. Á morgun þarf ég svo að fara að klára verkefnið á RÚV og fara svo til mömmu og skrifa upp tvö viðtöl sem ég er að gera utanskóla....

Jæja,hafið það gott um helgina!

Geðklofi

2008-02-20T14:11:00.000-08:00

Þessa vikuna er ég blaðakona...
Það var gaman fyrsta daginn minn á 24 stundum...leitið eftir gsh í blaðinu á morgun og á föstudaginn og þá ættuð þið að finna eitthvað pínu eftir mig!

Útvarpsstjarnan fer á 24 stundir næst

2008-02-16T09:47:00.000-08:00

Þá er útvarpskaflanum í þjálfuninni lokið. Hann gekk bara mjög vel og í gær unnum við Klara pistil og tókum viðtal og ég las svo upp pistilinn í síðdegisútvarpinu í gær! Mega gaman.
Það getur vel verið að það heyrist eitthvað í okkur á Rás 1 um helgina en ég veit ekki hvort eða hvenær það kemur svo ég segi ekkert meir.
En annars þá er það blaðið 24 stundir sem við heimsækjum næst. Það er mjög gaman að sjá þetta allt og prófa, en það tekur virkilega á. Sérstaklega þar sem maður nær ekki að koma sér almennilega inn í tölvukerfin sem eru æði mismunandi á milli staða á þessum stutta tíma.

En annars er allt mjög gott að frétta, strákarnir hraustir og í fínu formi og allir nokkuð glaðir bara!

KK.
g.

Útvarpsstjarnan....sem heyrist ekki í!

2008-02-13T09:49:00.000-08:00

Jæja gott fólk, ég er hrædd um að þið verðið að stilla á gufuna í fyrramálið. Klukkan 8:20, kannski fyrr þá kemur frétt eftir okkur Klöru í útvarpinu. Ég tók viðtalið og við unnum fréttina saman, en Klara les hana. Því miður heyrist ekkert í undirritaðri að sinni...en kannski maður fái tækifæri síðar hm. Þið vitið bara af því að ég er þarna á bakvið tjöldin! Jæja best að fara að hvíla sig, það tekur á að vera svona útvarpsstjarna!

Fréttablaðið

2008-02-08T12:34:00.000-08:00

Það er strembin en mjög skemmtileg vika að baki. Ég var í skólanum og svo var ég 3 daga í starfsþjálfun hjá Fréttablaðinu. Ég fékk að gera helling og fyrir glögga lesendur má sjá litla frétt sem ég þýddi og skrifaði í blaðinu í gær og í dag var líka efni eftir mig og ýmislegt ómerkt efni næstu daga. Voða gaman og vikan búin að líða hratt! Að vísu er ég mjög þreytt, Alexander er búinn að vera mjög pirraður því hann er að taka tennur og það hefur verið mjög erfitt fyrir hann. Búinn að vera með hita og varla sofið á nóttunni. Þannig að maður fer að fara í apótekið og kaupa grænt te og svoleiðis! Kannski maður sendi Höllu sms til Flórída og biðji hana um að redda einum pakka...hm.
En eins og ég segi þá hefur þetta verið mjög skemmtilegt! Í næstu viku fer ég svo á RÚV, útvarp og svona gengur þetta næstu fimm vikurnar.
Þannig að maður verður ekki mjög aktívur á öðrum sviðum kannski. Ég vona að ég geti samið við Kjartan því ég þarf mikið að læra um helgina...

Góða helgi,
kk.
g.

Ný síða...

2008-01-26T02:59:00.000-08:00

Hér er síða sem ég gerði í gær...en ég reyndar breytti henni aðeins, svo þetta er ekki lokaútkoman...er ekki alveg sátt við einn hlut en ég ætla að halda honum fyrir mig. Ætla að reyna að hemja freistinguna að taka síðuna alla í sundur og enda með því að eyðileggja hana. Stundum fer fullkomnunaráráttan alveg með mig...ég er svo óþolinmóð að ef ég er ekki búin að ná tökum á einhverju strax þá er allt ónýtt! En ég er búin að kaupa alltof mikið dót til að fara að gefast upp!!!

Fjör í kotinu....

2008-01-25T07:49:00.000-08:00

Strákahópurinn minn...

Já það er fjör hér í Sóleyjarimanum í dag. Kjarri úti í Frankfurt á "viðskiptafundi", mega-merkilegur! hehe....

Já hann alltaf að hugsa til framtíðar hann Kjarri minn. Við erum hér heima, Toggi og Alexander búnir að vera slappir, svo Kristó fékk bara að vera heima líka. Eins gott, las svo að það hefði verið varað við því að fólk færi út í óveðrið sem geisaði í morgun.

Hins vegar hefur geisað annars konar óveður hér með köflum og mamman hefur stundum þurft að hækka röddina, ekkert alvarlegt, en hins vegar hefur ekkert verið mikið hlustað á mömmu. Um leið og hún hefur snúið sér við hefur fyrri athöfnum verið haldið áfram....Svona er þetta bara. Ég hef notað tækifærið, þar sem ég hef ekkert þurft að læra (eða getað það er að segja, alla vikuna) og skoðað mikið það sem mig hefur vantað í skrapp- og kortagerðina! Fékk þennan forláta grip fyrir nokkrum dögum og nú er ég að bíða eftir nokkrum stimplum.

Er svo að hugsa um að kaupa mér liti, bíð eftir svari frá Kjartani hann ætlar að athuga þetta úti!

Púff....það tekur á að vera áhugamanneskja um föndurvörur og verslun á netinu! En það er líka gaman, Kjartan segir alltaf við mig að það sé gaman að fá pakka! Líklega er það rétt hjá honum...það er svo spennandi að fá pakka í póstinum, þá hefur maður eitthvað til að hugsa um og hlakka til.

En ég fæ pössun um helgina til þess að reyna eftir bestu getu að klára þau verkefni sem ég þarf að skila á mánudaginn kemur. Svo kemur Kjarri á sunnudaginn og þá getur maður kannski gert eitthvað seinnipartinn...sé það reyndar ekki í anda svo ég ætla að reyna að nýta tímann vel sem ég hef á morgun...

Jæja hafið það gott esskunnar mínnar!

Happy birthday to you, happy birthday to you....

2008-01-22T02:38:00.000-08:00

....happy birthday mr. president, happy birthday to you!
Innilega til hamingju með afmælið í gær elsku Halla mín!
Það var gaman að heyra í þér, heyrumst betur fljótlega krúttan mín!

Góður dagur

2008-01-17T08:51:00.000-08:00

Jæja, þá er dagurinn hálfnaður og ég búin með viðtalið. Þetta gekk nú bara öllum vonum framar. Ég var kannski fullmikið að grípa frammí og eyðileggja flæðið og segja jájájájájá...en ég var að minnsta kosti meðvituð um það og ég veit að þetta kemur allt með æfingunni! Ég var bara mjög glöð og ánægð og sérstaklega ánægð með að vera í þessu námi eftir að ég kláraði. Fann allt í einu til mikils léttis og gleði....kannski er ég bara í síðasta náminu mínu og verð EITTHVAÐ eftir að ég klára það. Þá get ég tekið eitthvað annað svona að gamni mínu...ég er allavega voðalega bjartsýn í augnablikinu. Ég er líka eitthvað svo ánægð með hvað verkefnin vaxa mér ekkert í augum. þegar ég var í áfanganum eigindlegar rannsóknaraðferðir fyrir örugglega 3 árum, þá miklaði ég það svo mikið fyrir mér að taka viðtöl. Hélt ég fyndi engan og þorði varla að tala við fólk, nú er ég bara að hugsa um hvern ég gæti talað við sem hefði eitthvað áhugavert að segja. Ég hef engar áhyggjur af því þótt fólk segi nei og voðalega litlar áhyggjur af því við hvern viðtalið sé. Auðvitað er fólk misjafnlega tilbúið til þess að koma í viðtal hjá óbreyttum mastersnema, en það er bara allt í lagi, ég skil það mjög vel!

Kannski er ég farin að finna fyrir því að lífið er ekkert endalaust og maður á að láta vaða á meðan maður mögulega getur....ég veit eiginlega ekkert hvað það getur annað verið því ég hef aldrei verið jafn kvíðalaus!

En annars er allt ágætt að frétta. Krakkarnir í stuði og við bara nokkuð sátt. Erum ekki farin að vinna almennilega í því að fá aðstoð á heimilið, en það kemur þegar við erum í stuði til þess að takast á við það. Núna er maður hálfvegis að humma þetta fram af sér því manni finnst þetta dýrt, manni finnst áhætta að fá fólk til þess að vera inni á heimilinu og með strákana og svo er maður með hálfvegis samviskubit því manni finnst vegið að súperkonu og karls ímyndinni held ég. Hmmmm.

En allt búið að sinni....
Og huldumaðurinn er......

.....Egill Helgason.

Gleði og vonbrigði

2008-01-16T04:35:00.000-08:00

Vorum að reyna að finna nýjan leikskóla handa strákunum í Grafarvogi í morgun. Því miður er þetta ekki rétti tíminn til þess að skipta. Okkur langar að fá þá hingað og svo finnst okkur þetta líka ágætis tími fyrir tilbreytingu hjá þeim...

En við setjum þá á lista og sjáum til.

Ég er byrjuð í skólanum og líst mjög vel á þetta. Það er auðvitað strax byrjuð svaka heimavinna og ég geri ekki neitt, hvorki les né leysi verkefni. Er maður ekki týpískur. Er reyndar að fara að taka viðtal við mjög frægan mann á morgun, fyrsta verkefnið í blaða og tímarita áfanganum. Ákvað bara sjálf að taka viðtal við þennan fræga og klára mann í stað þess að reyna að finna einhverja fjarskylda vinkonu...svo ég sendi honum bara meil og hann samþykkti strax að tala við mig! Engir stjörnustælar þar...vona bara að hann taki mig ekki í bakaríið á morgun! Hann er nefnilega þekktur þáttastjórnandi og tekur menn í nefið hægri og vinstri....

Ábyrgðarhluti

2008-01-12T10:27:00.000-08:00

Ég er svolítið hissa á nýjasta pistli Guðbjargar Hildar Kolbeinsdóttur á mbl.is, þar sem hún bloggar um óþarfa þess að vera að mennta fólk sérstaklega í blaða- og fréttamennsku. Hún vísar í vin sinn sem hún segir vera fyrrverandi blaðamann (veit ekki hvort hann er raunverulegur eða ímyndaður til þess að auka áhrifagildi sagnar hennar), sem á að hafa sagt henni hversu mikinn óþarfa hann teldi mastersnám í blaða - og fréttamennsku vera. Hann á að hafa sagt að í blaðamannastéttina vanti fólk sem sé sérmenntað í hagfræði og viðskiptafræði. Ég spyr sjálfa mig bara hvort ekki sé til nóg af fólki með þessa menntun, sérstaklega í ljósi þess hve hlutabréfamarkaðurinn á undir mikið högg að sækja þessa dagana. Og af hverju er þá ekki fleira af þessu fólki að vinna við blaða- og fréttamennsku? Getur verið að það hafi ekki hæfileika til þess að skrifa fréttir eða bara einfaldlega ekki áhuga? Getur verið að fólk eins og ég hafi farið út í blaða- og fréttamennsku vegna þess að ég hef áhuga á því og vill auka færni mína áður en ég held á vinnumarkaðinn eftir áralangt nám og heimilisstörf?
Hún klikkar svo út á því að nefna EINN háskóla í Bandaríkjunum sem hafi hætt með þetta nám fyrir 10 árum síðan. Ég verð að viðurkenna að ég hef ekki kynnt mér málið, en getur verið að af öllum þeim ótalmörgu háskólum sem eru í Bandaríkjunum að þá séu enn ótaldir þeir skólar sem ekki hafa tekið þetta nám út af stefnuskránni? Ég get ekki séð þýðingu þess að einn háskóli hætti með þetta nám fyrr en ég veit í hvaða samhengi sú ákvörðun er tekin.
Ég tel að kona í þeirri stöðu sem Guðbjörg Hildur er í, verði að vega betur og meta það efni sem hún lætur fara frá sér á netið. Jafnframt tel ég að hún verði að koma með fleiri en eina hlið á jafn mikilvægu máli sem þetta er, hún sjálf er fyrirmynd og er að láta skilaboð frá sér fara sem hlustað er á. Ég vona að minnsta kosti að henni sé fyllsta alvara fyrst að hún skrifar á þennan máta og best þætti mér ef hún notaði ekki fyrrverandi blaðamann sem skálkaskjól.
P.S. Veit ekki við hvað hún starfar í dag, en hún var semsagt að kenna fjölmiðlafræði við HÍ.

Óstjórn í borginni

2008-01-10T11:12:00.000-08:00

Hvað er málið með þessa ónýtu kumbalda niðrí bæ sem á að fara að halda uppá??? Þurfum við virkilega á því að halda að vernda svona drasl sem fellur ekki einu sinni undir verndunarreglurnar samkvæmt fyrstu skoðun, það virðist svo hafa snúist við vegna þess að eitthvað frægt lið er að ybba sig. Finnst þessu fólki virkilega að það sé ekkert annað mikilvægara til þess að eyða peningunum í??? Hvað með leikskólana, þar sem vantar tugi manna til þess að fullmanna þá???? Og sem dæmi þá veit ég dæmi þess að fullfrískur maður með ónýt lungu var tekinn út af biðlista þar sem hann var kominn á aldur (60 ára!) þótt hann ætti mörg ár eftir ef hann fengi aðgerð....Hvað ætli þetta bruðl með þessa ógeðslega ljótu og ónýtu húsakofa gæti heilað marga veika??? (Ég veit að það er hlutverk ríkisstjórnarinnar að halda uppi heilbrigðiskerfinu, en ég tek þetta sem dæmi um skrítna forgangsröðun hér á landi.) Og svo ég tali nú ekki um hvað miðbærinn má við andlitslyftingu!!! Mig minnir að það hafi verið talað við arkitekt (frægan en ég man ekki nafnið) í kringum brunann á gamla húsinu við Lækjargötu og hann sagði að það þyrfti að byggja nýtt í bland við gamla. Í borgarferðamálafræði er talað um það að við eigum að vernda það gamla en ekki alltaf á kostnað á þess nýja, sagan endurnýjar sig og húsin endurspegla þá tíma sem eru hverju sinni. Nú erum við til og þá megum við taka ákvörðun um að rífa eitthvað niður sem löngu er hætt að þjóna tilgangi sínum og byggja nýtt sem hentar okkar tíma. Í Brussel til dæmis er af og til byggt nýtt, en það þarf að fara eftir ströngum reglum, til dæmis varðandi hæð húsanna sem þarf að vera í samræmi við borgarlandslagið.
Af hverju er í lagi að endurbyggja hús algerlega þannig að ekkert stendur í raun eftir af uppruna þess, en má ekki byggja hús sem er í stíl við miðbæinn og er kostað af einkaaðilum sem munu koma til með að græða á þessu og vonandi allur miðbærinn????? Þetta er skítapólitík og ekkert annað.

Daglegt líf og netheimar

2008-01-09T14:08:00.000-08:00

Þetta var annasamur en mjög ánægjulegur dagur. Ég náði í Kristófer og Þorgeir á leikskólann klukkan ellefu þar sem Kristófer hafði kvartað undan verkjum í hálsi. Ég átti hvort eð er að ná í þá klukkan eitt, þar sem mannekla hefur enn á ný, hrundið af stað skerðingu á vistartíma í leikskólum borgarinnar. Klukkan eitt var svo bókuð 5 ára læknisskoðun á Kristófer, sem hann stóðst með prýði. (Þroskaskoðun og próf fyrst...).
Fyrst fór hann einn inn með hjúkkunni og við Þorgeir slógumst aðeins frammi...minn maður þreyttur og átti erfitt með að vera kyrr;). Þegar við komum inn tjáði hún mér að Kristófer hefði staðið sig eins vel og hægt var og undrunin skein úr augum hennar þegar ég sagði henni að á leikskólanum hefði okkur verið ráðlagt að fara með hann í próf vegna ofvirkni og athyglisbrests. Hún sagði óbeint að það væri svo langt frá því að geta staðist sem mögulegt væri, þetta væri bara skýr og orkumikill strákur sem þyrfti að hafa mikið fyrir stafni. Hún sagði að hún hefði nú tekið á móti nokkrum og það hefði í fyrsta lagi aldrei gengið að senda slíkt barn eitt inn í skoðunina...og hún sagði ýmislegt fleira. Ég var svo ánægð að heyra þetta, enda vorum við Kjartan svo hissa þegar þetta kom upp í leikskólanum, hann er nefnilega búinn að þroskast svo mikið. Hann er alltaf eins og engill þegar við förum með hann í búðir og fleira, það er bara mikið fjör í honum og hann er svolítið stríðinn...Það er litli þriggja ára púkinn sem þarf að vera í handjárnum núorðið....hehehehe!!!
En eftir að þetta próf var búið fórum við til læknisins sem skoðaði hann og vildi senda hann í lungnamyndatöku, þar sem honum fannst surga aðeins í vinstra lunganu. Sem betur fer virðist þó ekkert ama að barninu....7, 9, 13!

Og allt er bara voða gott að frétta af öllum.

En eitt í viðbót...er ég ein um að vera að flippa yfir óvönduðum færslum og kommentum illgjarnra Íslendinga á blogginu???? Áður fyrr fluttu blaðamenn fréttir og gáfu út fréttaskýringar og þá voru þær kröfur gerðar að þeir vönduðu heimildarvinnuna sína, já og hefðu aðgát í nærveru sálar. Í dag eru allir blaðamenn...og enginn virðist þurfa að taka ábyrgð á skrifum sínum!!??? En trúið mér...þannig verður það ekki að eilífu. Við erum bara ekki alveg búin að ná utan um þetta bloggæði sem heltekið hefur þjóðina, allir þeir sem eru með meðvitund eru farnir að blogga. Og það er einmitt málið, það er oft erfitt að átta sig á persónuleika fólks í gegnum bloggið. Þar eru margir sem eru til dæmis formlega greindarskertir og þroskaheftir og blogga svo eins og þeim lystir og fá alls konar komment frá venjulegu fólki...sem ég held að átti sig ekki alltaf á því að það er að ræða við fólk sem hefur kannski ekki getu til þess að hugsa rökrétt.

Smá skrapp í gangi

2008-01-06T04:24:00.000-08:00

Ég er ekki búin að vera neitt sérstaklega dugleg að skrappa að undanförnu þar sem ég er ekki með neitt skrifborð, en mér tókst þó að pína 2 fram úr erminni...Ég nota bara pappakassa, gólfið og hinar ýmsu töskur sem borð þangað til! Er ekkert voðalega ánægð með það, það býður ekki upp á mikið dundur, en á meðan uni ég hag mínum best að safna meira skrappdóti í sarpinn mwhahahahaaaaa!!!!!

Bara klikk náttlega...

2008-01-05T15:37:00.000-08:00

Já erum við ekki farin að skima um eftir hagstæðum tilboðum í sumarferðina...Finnst einhverjum kannski nóg um, en ef ég á að segja satt þá væri ég sko til í að fara í sólina núna í febrúar líka! Þetta skítaveður og kuldi sem er alltaf á þessu skeri hérna er að gera útaf við mig. Svona viðkvæm kona eins og ég er, með mína útsprungnu hendur og bronkítis alltaf á veturna, get bara ekki verið hérna nema í ákveðinn tíma held ég. Þegar ég er sem verst til dæmis á höndunum og er búin að vera að bera á mig áburð og vera í hönskum og ég veit ekki hvað og hvað allan veturinn, þá þarf ég samt ekki nema einn sólarhring í hlýrra loftslagi til þess að sárin grói. Og eftir 2-3 daga, sést ekki einu sinni að ég hafi borið þess merki að vera viðkvæm fyrir kulda. Meira að segja strákarnir fá svona þurrkubletti á fæturnar og bakið eins og ég hef stundum fengið.
Já svo við ætlum bara að taka á stóra okkar og fara með fótboltaliðið út...já það verður fjör! Mig kvíður svolítið fyrir því að passa þá alla á ströndinni, annars staðar er ekkert mál að vera alltaf með a.m.k. einn eða tvo í vagni og kerru. En ef maður fer á ströndina verður maður nú að leyfa Alexander að kæla sig þótt ekki sé meira og þá vandast málið...það má auðvitað ekki líta eina sekúndu af neinum! En ég held að þetta verði í lagi. Og ef það verður eitthvað vesen þá skiptum við okkur bara meira niður...
Við erum ekkert búin að ákveða hvert við ætlum að fara...sem er bara mjög skemmtilegt! Það verður bara fyrst og fremst að vera heitt þar!!!

2008

2008-01-01T07:24:00.000-08:00

Jæja, þá er árið 2008 runnið upp. Það er svo skrítið með fólk, því finnst alltaf sem svo margt muni breytast þegar nýtt ár rennur upp, það býst við fleiri tækifærum, meiri orku, meiri staðfestu og betri tíð. Sem betur fer þá hefur þetta oft þær afleiðingar að fólk leggur sig meira fram, en það getur líka þýtt að fólk gerir sér óraunhæfar væntingar. Ég hef ákveðið að heilsan mín hljóti að batna á nýju ári, að mér muni takast að halda heimilinu í betra horfi, að ég fái allar hillurnar og hirslurnar sem muni gera gæfumuninn í skipulaginu, að ég fái föndurherbergi og föndri meira, að föndurherbergið verði einnig lærdómsherbergi þar sem ég muni læra mikið á komandi ári og svo framvegis. Auðvitað hef ég ákveðið að taka mig á og losa mig við bumbuna, en það er ekki bundið við nýtt ár, það er mál sem ég ætla að vinda mér í um leið og ég fæ meiri orku en hún hefur ekki komið öll til baka eftir lungnabólguna. Fram að því ætla ég að reyna að borða aðeins hollara fæði og minnka nammið, en það verður farið í það mál eftir lok jóla, 6. janúar. Stærsta heitið mitt er þó að reyna að finna góða barnsfóstru til þess að létta undir hér á heimilinu. Kannski fæ ég einhverja pólska sem getur komið til mín milli 5 og 8 og hjálpað mér að elda og fleira á meðan ég get slakað á með strákunum. Og þá höfum við svigrúm til þess að skreppa út í búð, að hitta fólk, að ná í hitt og þetta, fara með hitt og þetta og svo framvegis. Nú er maður svolítið strekktur í að reyna að halda utan um þetta allt saman og ekki batnar það eftir að ég byrja í skólanum 14. jan...

Svo áramótaheitið mitt er í rauninni ekkert, hins vegar ætla ég að nýta þetta tækifæri til þess að losa aðeins um fjötrana og njóta lífsins betur. Það kemur bara strákunum til góða ef við höfum orku til þess að sinna þeim betur. Hana fáum við með hvíld og með því að minnka daglegt stress. Og það er gott mál að hafa manneskju til að grípa til þegar mann langar að skreppa aðeins út á kvöldin....

Sýnishorn af veðurfarinu í Boston...

2007-12-23T13:49:00.000-08:00

Lent í skafli við komuna til Boston...
...farið í stutta gönguferð við hótelið eftir langa bið í flugvélinni...tókst ekki að koma landganginu fyrir við hlið flugvélarinnar vegna hálku, svo við biðum í vélinni í einn og hálfan tíma (höfðum verið í biðflugi eftir að lenda í 45 mín...)...
...svona var slabbið næsta dag og næstu daga þegar byrjaði að rigna ofan í allan snjóinn!!!! Þetta var svona við allar göngubrautir, þannig að þegar maður þurfti að fara yfir götu þurfti maður að stökkva yfir! Og eftir því sem á leið þurfti maður sífellt að stökkva lengra, eða reyna að fara yfir skaflana og út á miðja götu frekar ef pollarnir voru orðnir of stórir til þess að maður gæti farið yfir þá! Ok Kalifornía eru Bandaríkin, Flórída eru Bandaríkin...en Boston....Boston er Ísland í fjórða veldi;))))

Jólin er´að koma...

2007-12-23T08:58:00.000-08:00

Jæja þá er komin Þorláksmessa enn á ný, ótrúlegt hvað tíminn líður hratt! Nú ætla ég að reyna að fara að setjast niður og ákveða hvað mig langar til þess að gera á næsta ári...Það er búið að vera svo mikið að gera hjá mér að ég hef varla haft við því að ákveða hvað eigi að vera í matinn um kvöldið, en nú eru strákarnir allir komnir á leikskóla (þegar þeir eru ekki veikir 7,9,13) svo maður getur farið að ákveða hvað maður eigi að gera.
Ég ætla í fyrsta lagi að halda áfram í mastersnáminu í HÍ. Það ætti nú að takast, þar sem einungis er kennt á mánudögum og þriðjudögum og þá einungis til 14:30...gæti ekki í öllum mínum bænum beðið um betri stundaskrá. Svona getur maður stundum verið heppin, eins og stundaskráin hefur stundum verið ómöguleg. Þannig að ég hef bæði svigrúm til þess að takast á við veikindi (innan vissra marka þó...) og til þess að klára heimalærdóminn!

Ég rétt náði að koma jólakortunum innanlands til skila (ekki alveg öllum þó skamm!) en enn á ný klikkaði ég á að senda jólakort út...ég sem ætla alltaf að föndra allt og allt...en ég er bara ekki búin að vera með heila síðastliðið ár og í sannleika sagt hefur heilastarfssemin verið ansi skert allt frá því að ég fór að hlaða niður börnum! En ég finn að þetta er smátt og smátt að verða einfaldara...

Ég ætla líka að læra á photoshop, er alltaf að bíða eftir því að prógrammið detti í fangið á mér óumbeðið, en á meðan ég þarf að punga út einhverjum tugum þúsunda læt ég þetta bíða!

Ég ætla að fara að hreyfa mig...nenni ekki lengur að lifa í voninni um að passa í sömu stærð og þegar ég var 17 og verða svo alltaf fyrir vonbrigðum þegar ég fer að máta...og rassinn uppúr og allt!

Ég ætla líka að reyna að gera meira með strákunum, lita meira, lesa meira og allt það...

Ég ætla að fá mér skrifborð og skrappa miklu miklu meira, þá get ég líka vandað mig meira af því að það er engin pressa að ganga frá!

Ég ætla líka að gera nokkra hluti sem ég segi ykkur frá seinna..

Það er alltaf gott að koma þeim hlutum frá sem hvíla þungt á manni, svo ég óska ykkur velgengni með það sem þið hafið ákveðið að gera en ég vona samt að þið séuð bara nokkuð sátt!

Ég óska ykkur líka gleðilegra jóla og farsældar á komandi ári....takk fyrir árið sem er að líða og öll hin á undan! Vona að þið njótið jólaundirbúningsins og jólamatsins og hlakka til að takast á við nýja árið með ykkur á ný!

A leidinni heim...vonandi

2007-12-16T12:08:00.000-08:00

Sitjum vid tolvuna a hotelinu og erum ad fara ad leggja i'ann...thetta er buid ad vera gaman, en samt verdur frabaert ad koma heim! Erum buin ad leggja mikid a okkur i shopperiinu og visakortid er farid ad emja a okkur...her er lika tvililka skitavedrid ad thad verdur lettir ad komast heim i islenskt skitavedur! Bara rok og rigning og snjor og slapp og risa pollar vid goturnar...Thank god for malls eins og Kjartan ordadi svo skemmtilega!

Fjúff....

2007-11-26T11:08:00.000-08:00

Fékk símtal frá 66°N í dag..fékk nýja úlpu! Ákvað samt að skipta yfir í svarta, en þar sem sú sem ég mátti fá var ekki til í minni stærð fékk ég mér aðra týpu og borgaði á milli. En ég fékk ekki staðgreiðsluafslátt af mismuninum...og konan útskýrði svo nákvæmlega fyrir mér hvernig ætti að þvo úlpuna til þess að ítreka það að henni fyndist þetta allt vera mér að kenna! Þrátt fyrir að þau hafi ákveðið að láta mig fá nýja...En skítt með það. Ég fékk nýja og það er léttir.
Skrítið samt að vera með saum á úlpunni sem verður fjólublár ef úlpan er ekki sett strax inn í þurrkara...og það verður eitthvað að vera með í þurrkaranum svo hún sé í lagi, man ekki alveg hvað það átti að vera.
(Setti hana reyndar strax inn í þurrkara, hún beið ekki neitt.)
Ég er enn með flensu og hita, komnar tvær vikur. Ég er orðin svo þreytt á þessu.
Strákarnir eru í fullu stuði, að vísu er Alexander búinn að ná sér í augnsýkingu af leikskólanum og alltaf er hann með astmann, en svona er lífið. Læknirinn hringdi áðan, en ég missti af símtalinu. Talaði inn á talhólfið og sagði að allt liti vel út, nema með þessi mótefni sem vantaði. Svo hann ætlar að hringja á þriðjudag.

Annars allt gott...

Skítaveður á rokrassgati

2007-11-23T03:56:00.000-08:00

Já veðrið hérna á skerinu hefur verið til skammar að undanförnu. Það rigndi nær stanslaust í 2 mánuði með tilheyrandi roki og að undanförnu hefur verið frost og rigning og rok til skiptis. Manni er alltaf kalt og kvefið bara fer ekki! Ég bíð eftir að grípa lungun á mér þegar þau poppa upp í næsta hóstakasti, þetta fer að verða ágætt.
Kannski ég hefði átt að reyna að fá kallinn með mér til suðrænnar eyjar í viku í stað þess að fara til Boston, þar sem er nú þokkalega kalt á þessum tíma?
Ekki bætir úr skák að ég er ekki með neina almennilega flík til þess að glíma við veðurguðina, Kjartan var búin að kaupa handa mér þessa fínu 66°N úlpu, en hún fór öll í hass þegar ég setti hana í vélina! Ekki bætti úr skák þegar ég setti hana í þurrkarann, hún brann einhvern veginn öll að utan! Ég bíð svars frá fyrirtækinu um það hvort þeir ætli að láta mig fá nýja eða hvort þeir telji að ábyrgðin liggi hjá mér, þeir eru ekkert að flýta sér, það er komin vika síðan ég fór með hana og á meðan sit ég hér í hóstakasti og kvíði því að fara út fyrir hússins dyr
Kristófer er líka búinn að vera að hósta í langan tíma, en ég held þó að það fari skánandi sem betur fer. Alexander fékk vírus í augað í gær og ég er búin að fá áburð svo vonandi fer það sem fyrst. Meira ógeðið.
Kristófer er kallaður límheilinn af leikskólakennurunum á deildinni sinni, hann man allt og gengur rosalega vel að læra nýja hluti. Það er eins gott að vera ekkert að reyna að plata hann, hann er fljótur að sjá í gegnum mann.
Þorgeir er lítill sætur, smámæltur hnoðri. Kristófer hefur alltaf verið svo harður, en Þorgeir er miklu meira barn. Þeir geta unað sér vel saman, en stundum slær í kekki. Þá er það yfirleitt út af því að Kristófer sér tækifæri til þess að stríða litla guttanum, sem er með þvílíkt skap og rýkur upp...og þá skemmtir hinn sér vel! Þangað til að hann er laminn eða bitinn af litla villidýrinu....
Það verður gaman að sjá hvernig týpa Alexander verður, ég held að hann sé eitthvað sambland af hinum tveimur. Er ekki eins rólegur og Þorgeir var, en langt frá því eins órólegur og Kristófer var. Það er samt margt búið að breytast á stuttum tíma, er hættur á brjósti og er farinn að sofna einn í rúminu sínu á kvöldin. Ég tek hann þó alltaf uppí til mín á endanum. En þetta kemur allt....
Jæja best að fara að gera eitthvað...over and out.

Afmæli enn og aftur

2007-11-16T13:39:00.000-08:00

Og nú er það Þorgeir sem hefur bætt einu ári formlega í kladdann! Drengurinn varð 3ja ára þann 14. nóvember síðastliðinn. Við héldum upp á þetta í örmynd á sjálfan afmælisdaginn en á morgun verður svo formlega afmælisveisla fyrir drenginn! Ég ákvað að reyna að baka núna...með misjöfnum árangri. En fyrir þá sem halda svangir á leið heim þá bendi ég á að í Spönginni sem er á næsta horni eru allmargir skyndibitastaðir, einn veitingastaður, ein sjoppa og tvær matvöruverslanir! Þannig að þið þurfið að minnsta kosti ekki að aka alla leið heim með gaulið gargandi hehe! Nei, nei, ég lofa að það verður ekki svo slæmt....á alltaf haust kex inn í skáp líka.
Annars er lítið að frétta. Er búin að vera svakalega slöpp af einhverri helv..flensu. Er að skána núna en á þriðjudaginn var ég með 39.5 stiga hita á °C takk fyrir! Þegar maður á stórt heimili, tala ekki um vikuna sem undirbúningur fyrir afmæli stendur fyrir, þá slappar maður ekki mikið af. Ég kann líka svo lítið á svona veislur, fer alveg á límingunum. Finnst alltaf svo mikið mál að finna hvaða kökur á að hafa og svona. Enda eins og ég segi, valið klikkaði svolítið. En það reddaðist allt. Næst verð ég búin að prófa þetta allt áður, þetta er bara af því að ég nenni aldrei að baka, annars væri maður kominn með pottþéttan menu! Þetta er bara eins og í gaggó, maður æfði sig aldrei fyrr en í prófunum....með misjöfnum árangri:(((

En annars er allt gott að frétta. Við Kjartan hlökkum mikið til að fara til Boston...svona þegar við munum eftir því að láta okkur hlakka til;))) Það verður kærkomin "hvíld" og víst að undirbúningurinn fyrir jólin liði alltof hratt ef ekki kæmi þessi ferð til. Dagarnir eyðast upp og verkefnin safnast fyrir...núna fær maður næði til að velja jólagjafirnar a.m.k.
Eða kannski maður sofi bara upp á hótelherbergi allan tímann...það er leynilega fantasían mín! Og hver veit nema maður láti þetta eftir sér einhvern tímann...en ég hugsa að ég myndi ekki láta það fréttast....

Hafið það gott elskurnar mínar!

Og vinningshafinn er.....

2007-11-10T02:21:00.000-08:00

Sjáiði þetta:
https://www.croppinparadise.com/

Boston

2007-11-06T08:11:00.000-08:00

Hér er hver dagur eins...svo ég hef lítið bloggað. Hef þó smá fréttir, eftir margra mánaða suð, hefur mér loksins tekist að draga kallinn minn með mér til Boston! Við förum í jólaferð, bara tvö, 13. - 16. desember. Ætlunin er að kaupa jólagjafir og ganga um og drekka öl og vera ligeglad. Sjáum til hvort mér takist að tosa nokkra aura úr buddunni hans og kaupa mér smá dóterí...híhíhí. Sófinn má bara bíða ekki satt???

En annars er bara allt rosalega gott að frétta. Strákarnir blómstra, kallinn minn er alltaf jafn sætur og ég þarf að fara að drífa mig í ræktina!!! Er orðin svolítið mjúk...svona er að vera heima allan daginn og borða kex...

Kjartan er farinn að komast í jólastuð og ég, sjálfur Trölli fæ mig varla til að fara með honum í bíltúr þessa dagana. Og senn koma jólin og Heims um ból hljóma í hæsta styrk. Það var nógu slæmt þegar hann setti eitt og eitt jólalag á í JÚLÍ en nú fer að færast harka í þetta...

Já og ég náði í bílinn minn í dag. Það var keyrt á hann fyrir viku og nú er hann eins og nýr. Það er eins og einhver æðri máttarvöld hafi kippt í spotta, því sama dag gáfu bremsurnar sig alveg svo ég varð að gera eitthvað í málunum. Viðgerðarkallinn sagði að bremsurnar aftan á hefðu verið alveg óvirkar og sýndi mér einn bremsudiskinn. Hann var innan við einn sentimeter á þykkt en nýjir eru þeir um 5 sentimetrar...
Sama dag og bremsurnar fóru alveg, (en ég fann það á því að petallinn fór lengst niður í gólf og ekkert gerðist, auk þess sem viðvörunarljós kviknaði í mælaborðinu) fór að snjóa svona rosalega og hálka á götunum, en engin leið að komast að á hjólbarðaverkstæði. Við svona aðstæður keyrðum við um allt til þess að komast á smurstöð og reyna að fá skipt um dekk, þar til ég sá að nóg var komið og keyrði á 20 km hraða heim. Hryllilegt að hugsa til þess ef eitthvað hefði gerst...

En ég lofa að skrifa meira seinna og gaman að sjá myndirnar hjá þér Birna mín!!! Takk fyrir það;))))

Letiblóð!

2007-10-22T15:26:00.000-07:00

Já ég skal viðurkenna það, ég hef ekki verið neitt sérstaklega iðin við að blogga að undanförnu. Ég er samt ekkert hætt, bara í smá hvíld. Ég fór í minniháttar aðgerð um daginn sem gerir það að verkum að ég er frekar lúin og samt nóg að gera heima. Alexander hefur ekki verið fullan dag á leikskólanum og að undanförnu hefur hann lítið sem ekkert verið. Hann er frekar slæmur af astmanum og hefur verið í blóðprufum og læknisskoðunum útaf því og það nýjasta er að hann fékk eyrnabólgu, svo ég hef mikið verið með hann. Ég fékk svo skemmtilega hringingu í morgun frá leikskóla þeirra eldri, en þá höfðu hvorki meira né minna en 12 starfsmenn tilkynnt sig veika, svo ég varð að ná í þá takk fyrir! Það gekk alveg vonum framar og pabbi tók þá svo smátíma á verkstæðið á meðan ég skaust með Alexander til læknis og í blóðprufu.
Annars gengur allt ljómandi vel bara. Stundum er bara gott að það sé ekkert of mikið að frétta, það merkir að allt sé í rólegheitum og fínt bara!

Sólargeislarnir mínir

2007-10-08T03:12:00.000-07:00

Persónuleikapælingar

2007-10-06T08:03:00.000-07:00

Þegar maður á 3 stráka og finnst manni stundum hafa fengið nóg af sömu tegundinni (hahaha), þá er gaman að sjá hversu ólíkir þeir eru í raun þrátt fyrir að vera af sama kyni.
Í gegnum tíðina hef ég reynt að venja þá á að ganga frá á eftir sér og það hefur gengið á ýmsu. Kristófer hefur oft tekið langan tíma í dramaköst og lítið gert annað en að kvarta yfir því að þurfa að gera "allt", á meðan Þorgeir heyrir ekkert ef hann nennir ekki að ganga frá. Þegar hann sér að maður hefur ekki lengur þolinmæði til þess að bíða, hendist hann til og gengur frá öllu í einum rykk.
Þeir eru jafn ólíkir þegar kemur að því að búa um rúmið, það er ekki langt síðan Kristófer byrjaði að búa um rúmið möglunarlaust, en hann hefur nú alltaf gert það á endanum. Hann hendir sænginni á rúmið og þá er það sama og búið.

Þorgeir hefur svolítið annan stíl. Hann er nú bara tæplega þriggja ára og nýbyrjaður á þessu, en það mætti halda að greyið væri nýútskrifaður úr Húsmæðraskólanum. Hann byrjar á því að taka sængina og hrista hana til, leggur hana svo varlega á rúmið með sömu takta og nautabanar þegar þeir sveifla rauðu skikkjunum framan í nautin, vandar sig svo að draga hvert einasta horn út og endar á því að laga til bangsana og breiða sængina undurblítt yfir þá. Fyrir vantrúaða er hér sönnunargagn frá því hann gekk frá rúminu í morgun:

Amma og afi í mat

Alveg búinn eftir leikskólann!

Home alone!

2007-10-05T02:56:00.000-07:00

Ég er eins og prinsessa heima með prinsunum mínum, Þorgeiri og Kristófer. Litli kallinn verður í leikskólanum til hálftvö í dag...
Það er voða rólegt hjá okkur ennþá, þeir eru uppi að horfa á Emil í Kattholti og ég get gert næstum því allt sem mér dettur í hug á meðan. Já það er hentugt að henda þeim fyrir framan imbakassann!
Annars er voða lítið að frétta, lífið gengur sinn vanagang. Er aðeins farin að skrappa jólamyndirnar frá því í fyrra, hér er ein:

Og svo heldur maður bara áfram að vinna upp það sem mann langar að skrappa um á meðan maður er ekki á fullu í skólanum.

Hafið það gott í dag!

Hvað á ég að gera?

2007-10-02T04:33:00.001-07:00

Alexander verður til klukkan 2 í leikskólanum í dag...hvað á ég að gera af mér???
Ég er búin að strauja aðeins og setja í uppþvottavélina, ganga frá þvotti og vaska upp...en einhvern veginn fer hnúturinn úr maganum á mér ekki burt. Ég er farin að efast um allt og þar á meðal þá ákvörðun mína að setja hann á leikskóla svona ungan. Litla krúttið mitt...
Ég ætlaði að byrja í skólanum auðvitað, en nú er mánuður liðinn af önninni og ég hef ekki komist í einn einasta tíma svo það er fullseint í rassinn gripið að byrja núna. Stundataflan er þar að auki ekki að gera neitt kraftaverk, 2 tímar byrja klukkan 8, og einn byrjar klukkan 3 og er til hálfsex. Ekki alveg að ganga upp. Og í einum tímanum á að vera búið að skila skylduverkefnum og fara á fyrirlestra sem greinilega gengur ekki upp...
Ég var rosalega skotin í einum áfanganum, Þorsteinn J. sér um hann. Þá fara krakkarnir á vettvang með tökumann og taka viðtöl við fólk sem er að vinna við kvikmyndahátíðina, mega vera leikarar, leikstjórar, áhorfendur og svo videre...herlegheitin birtast svo á netinu. En því miður þá hef ég ekki haft tíma til að einbeita mér að því og ég fer ekki að gera þetta næstum því.
En ekki meiri afsökunarlestur, ég verð bara að einbeita mér að því að vera heimavinnandi húsmóðir...sem er ekki alveg ég. En svona er lífið.
Mér finnst eiginlega verst að heyra athugsemdir fólks sem setur upp stór augu og segir "Leikskóla!? Svona ungur???"
Þrátt fyrir að ég sé með varnarfyrirlesturinn alveg tilbúinn þá líður mér ekki eins á bakvið grímuna. Sannleikurinn er sá að mér finnst ég vera að svíkjast um.

Og hér er ein síða sem ég skrappaði af langömmu og Alexander.

This is a man´s world...

2007-09-23T03:44:00.000-07:00

Ég er sko ekki við einn karlmann kennd...heldur hvorki meira né minna en fjóra! Hérna eru myndir af þeim fjórum karlmönnum sem ég fæ að kyssa og knúsa og tuða í á hverjum einasta degi:

Og svo tróð ég sjálfri mér með;)))

Annars er allt gott að frétta af stóru fjölskyldunni í Sóleyjarimanum. Hægt og rólega er verið að setja upp það sem eftir er og sumt geymir maður áfram. Það er víst ekki hægt að gera allt í einu...
En okkur líður rosalega vel hérna og ég er aðeins farin að venjast stiganum. Er samt mest niðri og fer yfirleitt bara upp til þess að þvo þvottinn og ganga frá honum.

Ég er komin í skrapphóp, rosalega ánægð með það. Þær hittast annaðhvert þriðjudagskvöld og skrappa og mig hlakkar geðveikt til. Að vísu þá situr smá kvíði í mér út af Alexander, hann er þvílíkur mömmukall, en svona er þetta alltaf þegar þau eru svona lítil. Hann byrjar í nýrri aðlögun í þessari viku, byrjar hjá Krissu á Undralandi en hún var fóstran þeirra Kristófers og Þorgeirs og við elskum hana. Svo vonandi þá gengur næsta vika betur en sú síðasta...

Mamma og Guðrún og fjölskylda eru alveg að fara út til Spánar, fara 4. október. Oh, ég vildi að ég færi með...Við Kjartan ætlum kannski að láta reyna á það að fara með súpuna til Kanaríeyja eftir jól til að stytta veturinn...eða stytta aldur ég veit það ekki. Þetta verður verðugt en krefjandi viðfangsefni. Kannski við reynum að fá mömmu bara með til Disneylands, þá er einn krakki á mann ekkert vandamál og allir skemmta sér vel!!!

Jæja, ætla að hætta að hugsa upphátt og vona bara að allir hafi það sem best...ætla ekki einu sinni að byrja að tala um skólann!!!

Komin heim frá Pétursborg...

2007-09-17T14:36:00.000-07:00

Jæja, þá er maður aðeins farin að komast á jörðina. Þetta var ekkert smá skemmtileg og fræðandi ferð. Maður gleymir þessari upplifun seint. Því miður skemmdist kortið okkar svo við eigum fáar myndir eftir, en einn tannlæknirinn á stofunni var svo góður að skrifa allar sínar myndir á disk svo ég fæ að birta nokkrar (tek mér bessaleyfi;)).

Við fórum að skoða þvílíku hallirnar og kirkjurnar að það gleymist seint, hluti hópsins fór líka að sjá ballet í sögufrægri höll:

(myndasmiður Guðbjörg).

Ó já, við Kjartan fórum sko með. Þetta gerir maður ekki oft á lífsleiðinni og það var svooo þess virði, alveg magnað. Ballettinn var sýndur í Hermitage höllinni, í einkaóperuhúsi Katrínar miklu. Þarna sat hún í den með sinni hirð og horfði á það sem hana sýndist!

Þetta er höll Péturs mikla, ein af sumarhöllunum hans. Flottasta höll og garður sem ég hef séð hingað til og þetta er bara brot af öllu dæminu (myndasmiður Guðbjörg).

Það var McDonalds við hliðina á okkur (og á hverju öðru horni), en þetta er án efa sá flottasti McDonalds sem ég hef séð á ævinni. Granítborð og leðursófar, það var meira að segja leður á veggjunum og allt tandurhreint!

Við drukkum líka ótæpilega af vodka, en sem betur fer fór hann vel ofan í alla. Það er einhvern veginn allt öðruvísi að drekka vodka í Rússlandi, hann er bragðmildur og lítið mál að renna honum niður.

Meira um Rússland síðar, ætla að skoða myndirnar hans Sigfúsar og setja nokkrar inn við tækifæri.

Það sem er annað að frétta er að Alexander litli er byrjaður í aðlögun í leikskólanum. Hann er ekkert mjög ánægður með þetta vesen litla greyið, langar ekki að missa mömmu meira eftir langan aðskilnað. En svona er lífið. Skólinn minn er líka byrjaður, er búin að missa 2 vikur úr (sem er allt í lagi svosem), en fór í einn tíma í dag og það var bara voða gaman.

En semsagt, allt gott að frétta héðan!!

KK.

g. og fjölskylda.

Russia here we come!

2007-09-06T01:36:00.000-07:00

Jæja þá er heldur betur farið að styttast í ferðina okkar. Ég gróf upp þetta kort á Google (takk google!) og fyrir þá sem ekki vita er Pétursborg í horninu lengst til vinstri. Hún liggur semsagt alveg upp við Finnland. Ok ég vissi það ekki heldur.

Jæja best að fara og gera eitthvað. Set inn myndir þegar við komum heim!!
Hafið það sem allra best um helgina,

;) G.

Góðir vinir

2007-09-05T02:18:00.000-07:00

Síðdegis í gær, fengum við fyrstu matargestina í Sóleyjarimann. Það voru vinir okkar Maggi, Einara, Írena Björt og Krista Gló.

Þau búa um þessir mundir í Gautaborg þar sem þau eru við nám og störf.

Það var alveg meiriháttar gaman að fá ykkur í heimsókn, takk fyrir innlitið kæru vinir!

Bleika og bláa liðið.

Biggi, Rósa og Bjarnheiður kíktu líka til okkar í fyrsta skipti frá Edinborg en af einhverjum ástæðum láðist að taka fjölskyldumynd, hér er þó litla prinsessan hún Bjarnheiður, sem er ekkert svo lítil lengur. Gaman að sjá ykkur elsku fjölskylda, ég vona að við náum að heimsækja ykkur áður en þið komið heim!;)

Ekki á morgun, heldur hinn förum við Kjartan til Pétursborgar...ég er svaka spennt en mig kvíður mikið fyrir að skilja litla hjartað mitt eftir heima. Toggi og Kristófer eiga ekkert eftir að taka eftir því að við séum ekki, það verður svo gaman á Álftanesi hjá ömmu Heiðu, en það er önnur saga með litla mömmukallinn minn. Hann er ekki alveg hættur á brjósti og þrjóskast ennþá við að drekka úr þessum bölvaða pela! En ég held að þetta eigi allt eftir að reddast, hann drekkur alltaf smá og svo kemur það okkur til góða að hafa búið í allt sumar hjá mömmu og pabba því mamma verður með hann og það líkar honum vel!
En annars þá er bara allt gott að frétta héðan úr Sóleyjarima, over and out!!!

Nokkrar myndir af nýju húsi og nýjasta barninu

2007-08-31T16:15:00.001-07:00

Tímamót

2007-08-30T06:34:00.000-07:00

Jæja þá er yngsta barnið búið að fá inngöngu á leikskóla. Hann fetar að sjálfsögðu í fótspor bræðra sinna og byrjar skólagönguna á Sólgarði. Að sjálfsögðu, hvar annars staðar ætti hann að fá inngöngu? Þeir á Sólgarði eiga erfitt með að losa sig við eldri börnin vegna manneklu á leikskólum Reykjavíkurborgar, en börn komast í fyrsta lagi inn þar 2ja ára, þótt þau taki við börnum frá 1 og hálfs árs samkvæmt stefnuskrá skilst mér. Og ég er fegin að hann byrji á leikskóla, því mig hefur aldrei langað til þess að senda börnin mín til dagmömmu. Ég þekki enga góða og það er erfitt að fylgjast með því hvernig gengur þegar aðeins ein manneskja er til frásagnar...
Mér finnst hann fullungur, en hann er líka bara svo mikið mömmubarn og þá er líka ágætt að fara að slíta naflastrenginn. Fyrsta skrefið til þess verður stigið eftir eina viku...en þá förum við Kjartan til Pétursborgar. Guð minn góður er þetta bara ein vika??? Ég sló fyrst inn 2 vikur en síðan fór ég að hugsa, 7. sept förum við út...30. ágúst í dag....OMG!!! Fletti upp dagatalinu og þarna var þetta svart á hvítu...ein vika!!!
Ég fer að skjálfa núna...

Sóleyjarimi kominn í samband við umheiminn...

2007-08-24T03:10:00.000-07:00

Já það er komið netsamband í Sóleyjarimann og þetta blogg er fyrsta bloggið sent þaðan út! En þrátt fyrir aukið samband útávið er samt búið að fyrirbyggja að hver sem er fái að skima inn í líf okkar í Sóleyjarimanum. Það er semsagt búið að gardínuleggja allt slotið ef svo má að orðum komast. Útkoman er vægast sagt glæsileg og allt annað er að koma. Kjartan er búinn að festa upp hina glæsilega (gler)kristalsljósakrónu okkar og hún sæmir sér vel yfir borðstofuborðinu.
Í dag verður svo haldið upp á 5 ára afmælið hans Kristófers í Sóleyjarimanum (leikskólaútgáfan) en fjölskylda og vinir eru boðnir á sunnudaginn klukkan 2.

Hlakka til að sjá ykkur á hinu nýja heimili okkar.

p.s. Við Alexander vígðum Sóleyjarimann formlega með því að sofa hér í nótt...yndislegt!!!

Eitt skref enn...

2007-08-21T15:31:00.000-07:00

Við erum alveg að fara að flytja. Nú erum við bara að bíða eftir gardínunum og síðan erum við flutt. Allt í lagi þótt það séu einhver smáatriði eftir sem við gerum smátt og smátt. Við skiptumst á að fara uppeftir. Ég fer á daginn og tek upp úr kössum og laga til og Kjartan fer á kvöldin og borar og fiktar í rafmagni og svoleiðis. Það eru ágætis skipti þar sem ég er ekkert inni í neinum húsbyggingarmálum...kann ekkert á múrverk og rafmagn og allt þetta!!!
Gardínurnar koma kannski fyrir helgi en líklega strax eftir helgi...kannski gefumst við bara upp á að bíða og drífum okkur inn! Finnst það ekki ólíklegt. Erum amk að fara að halda upp á afmælið hans Kristófers, á föstudaginn fyrir leikskólann og líklega á sunnudaginn fyrir alla hina.
Hilsen í bili,
G.

Lífið er skrapp

2007-08-19T05:19:00.000-07:00

Náði að skrappa eina mynd í sumar og hér er afraksturinn:

Þetta fer allt að koma. Nú það bara dagaspursmál hvenær við flytjum inn og ég klára að setja upp skrappherbergi í fataskápnum!

Tatatata......

2007-08-15T15:56:00.000-07:00

Guttarnir mínir

Það fer að nálgast leiðarlok í innréttingarmálum. Við erum farin að undirbúa það á fullu að flytja í húsið og er farin að koma ágætis mynd á innyflin! Hægt að horfa á sjónvarpið án þess að vaða í drasli og ég er komin langt á veg með að raða í eldhúsið. Þarf örugglega að endurraða svolítið en maður þarf að byrja einhvers staðar er það ekki??? Er að minnsta kosti búin að þrífa það...sem er ekki hægt að segja um ýmsa aðra parta hússins, þarf að passa mig að láta mig ekki kvíða fyrir, heldur að hlakka til. Hlakka til að þrífa svo við getum notið þess að flytja inn og slappa af. Hm....það er að minnsta kosti boðskapur (sjálfshjálpar-) bókarinnar, Leyndarmálið, sem ég fjárfesti í og las um helgina. Ágætis áminning að lesa svona bók þótt maður þurfi ekki að taka allt bókstaflega.

Það styttist í Pétursborgarferðina. Lilli kútur er enn á brjósti og mikill mömmukall...við eigum að fara út 7. september og komum aftur 11. sept. Get ég þetta???? OMG.

Sögustund á Svalbarðseyri

Skelltum okkur á Svalbarðseyri um helgina og fórum á Fiskidaginn á Dalvík og á handverkshátíðina á Hrafnagili á laugardaginn og á sunnudeginum héldum við upp á afmælin þeirra Steindórs Óla og Halldórs Viðars sem urðu 3ja ára og 1 árs.
Þetta var mjög fín ferð og allt gekk vel með strákana. Kristófer var svolítið leiður á að hanga svona lengi í bílnum og Alexander fékk nóg áður en við fórum í göngin á leiðinni heim. Ég og strákarnir þurftum að halda úti svaka skemmtiprógrammi til þess að reyna að róa krílið niður.

Jæja, best að hætta þessu rausi. Það er semsagt allt gott að frétta og fer að verða hægt að skreppa hvenær sem er í kaffi í Sóleyjarimann!!! Velkomin, velkomin!!!

Verslunarmannahelgin eða?

2007-08-03T18:07:00.000-07:00

Ég er búin að vera að velta því fyrir mér hvort það sé ekki örugglega að koma verslunarmannahelgi? Það eru allir dagar eins hjá mér og skiptir þá ekki máli hvort um verslunarmannahelgi sé að ræða eða ekki. Við töluðum um það í upphafi sumars, við Kjartan, að það væri nú gaman að gera þetta og hitt um þessa fyrrnefndu helgi. En undanfarið hefur verið mikið að gerast í iðnaðarmannamálunum og Kjartan fylltist aukinni bjartsýni. Hann hefur því verið uppi í húsi langt fram á nætur að undanförnu að dútla við ýmsa hluti. Hann setti til dæmis sjálfur upp blöndunartækin í sturtunni, kranann í eldhúsið og vaskinn á gestabaðherbergið. Hann er uppi í húsi núna og var planið að klára að tengja vatnið og að ég held að að setja upp vaskinn á aðalbaðherberginu...með dyggri aðstoð Frikka.
Þýðir þetta að ég skuldi enn meiri þrif þegar kemur að því að flytja??? I think so...
Díana vinkona kíkti til mín upp í hús í gær, en við vorum saman í ferðamálafræði og erum saman í mastersnáminu núna, fyrir þá sem ekki vita. Það var meiriháttar gaman að fá gest í Sóleyjarimann...þrátt fyrir frekar hráslagalegt útlit! Vonandi kíkir hún Birna vinkona mín frá eyðimörkinni til mín í heimsókn líka...ég hringi um helgina Birna og vona að þú verðir heima...reyndar vona ég bara að þú verðir að gera eitthvað skemmtilegt hvar sem það verði, en að þú kíkir í heimsókn áður en þú ferð aftur heim!!!;)))

Fyrsti bananinn

2007-07-20T17:08:00.000-07:00

Þorgeir Sölvi náði sér í banana inn í eldhúsi í dag...þessi drengur hefur ekki borðað ávexti síðan hann fæddist. En hann settist í makindum með hann í stólinn hans afa inni í stofu og tók utan af honum og borðaði hann yfir Valíant. Trúði þessu varla og ákvað að veita þessu ekki neina athygli. Vonandi er þetta bara allt að koma, kökuskeiðið á enda og ávaxtaskeiðið að renna upp.

Útópía...

2007-07-17T13:48:00.001-07:00

Veðrið hefur sannarlega verið himneskt undanfarinn mánuð....

Til hamingju með afmælið Kjartan minn!!!

2007-07-10T01:21:00.000-07:00

Hann á afmæli í dag, hann á afmæli í dag, hann á afmæli hann Kjartan...hann á afmæli í dag!!! Veiiii.....

Já hann er 32ja ára í dag þessi elska...til hamingju Kjartan minn!!!

Og við getum örugglega flutt inn von bráðar...ef handriðakallarnir standa sig. Siggi málari, málaði allan stigann hvítan í gær og í dag verður önnur umferð máluð og þar með er þeim kafla lokið...hjúkk. Þetta lítur bara ágætlega út og eru ágætis endalok á leiðinlegu máli.

Mig er aftur farið að hlakka til og ég held að þetta verði bjútífúl á endanum. Vonandi að maður fái að kroppa smá sumarsól á pallinum...héldum að við fengjum að njóta alls sumarsins í nýja fína húsinu en sú varð ekki raunin. Enda alger bjartsýni ;).

oh noooo....

2007-07-08T12:54:00.000-07:00

sáum nýju útgáfuna af stiganum áðan. Eitt orð....fokk.

Annars hugar málari og málarameistari

2007-07-07T02:04:00.000-07:00

Það er ýmislegt sem kemur uppá þegar maður er með iðnaðarmenn í vinnu. Við Kjartan fengum nett sjokk í gærkvöldi þegar við litum inn í Sóleyjarima til þess að athuga hvernig málarinn hefði það...
Tveimur dögum áður hafði ég hitt málarameistarann sem umsjón hefur með verkinu og við ræddum það til hlítar hvernig stiginn ætti að vera. Við komum okkur saman um að reyna að halda svolítið hráa lúkkinu og mála hann gráan, sleppa því að mála þrepin og sparsla bara þar sem væru skemmdir.
Hvað gerist?
Þegar við Kjartan komum í gær var stiginn orðinn skjannahvítur...en ekki búið að mála þrepin. Hélt hann virkilega að við vildum grá þrep í annars hvítum stiga?
Við höfðum samband við málarameistarann sem var þá staddur úti á landi og hann sannfærði okkur um að þetta hefði verið misskilningur af hálfu málarans og þetta yrði lagað...djísus kræst!
Einhvern veginn sé ég ekki fyrir mér að þetta verði almennilegt...ætli maður verði ekki að mála stigann alhvítan á endanum?

Málarameistarinn er mættur á svæðið...hóhó santa.

2007-07-04T16:46:00.000-07:00

Já ótrúlegt en satt, málarameistarinn mætti í dag og tók stigann út. Hann kemur í fyrramálið...jibbí. Þá er bara að hringja í handriðadeildina og þá fer þetta allt að koma. Gaurarnir sem setja upp eldhúsið komu ekkert í síðustu viku og eru ekki enn farnir að koma í þessari viku...þvílíkt og annað eins rugl. Hvernig dettur mönnum í hug að reka fyrirtæki á þennan hátt? Nei, þeir hafa ekkert hringt til þess að láta vita, hvorki að þeir komi ekki né hvenær þeir komi. Magnað. En þetta er allt að gerast.

Fyrsti göngutúrinn

2007-06-29T05:50:00.000-07:00

Jæja, þá er ég búin að fara í fyrsta göngutúrinn í Grafarvogi. Það var mjög þægilegt að komast frá húsinu mínu og ganga um (að vísu vantar alla göngustíga í götuna og næstu götur). Veðrið var líka yndislegt. Ég fór í búð, enda Spöngin rétt hjá og Alexander sofnaði strax. Svo ég dreif mig í Sóleyjarima og náði að laga slatta til í bílskúrnum á meðan Alexander svaf. Svo þessi dagur lofar góðu...

Drottningin í götunni

2007-06-29T01:57:00.001-07:00

Jæja þá er ég búin að eignast fyrstu óvinkonuna í Sóleyjarima. Ég fór þangað hálfátta í gær til þess að veiða dót upp úr ruslinu, sem stigakallinn átti og ég mátti víst ekki henda. Ég var smá stressuð að ná í þetta áður en hann mætti aftur og Alexander minn var hágrátandi í aftursætinu. Ég held samt að ég hafi ekki ekið á ólöglegum hraða í hverfinu, þótt ég hefði örugglega mátt aka hægar. En þar sem ég er búin að koma dótinu fyrir og er að fara að hugga Alexander, kemur ljóshærð kona askvaðandi inn á mína lóð og stendur yfirlætislega yfir mér og spyr mig hvort ég sé nú ekki til í að aka hægar inn hverfið næst að það séu nú börn þarna og blablabla. Eins og hún sé yfirvaldið í götunni og ég einhver aumur gestur sem komi alltaf á ofsahraða inn í hverfið hennar.! Sem er einmitt ekki það sem ég geri, ég er nú vön því að smiðirnir séu að labba þarna fram og til baka yfir götuna án þess að líta til hægri né vinstri og margir leyfa eins á hálfsárs börnum meira að segja að leika sér á aðalgötunni áður en maður beygir inn í hverfið....
Svo ég segi ekki neitt og huga að Alexander. Þegar ég kem aftur að ökumannsdyrunum stendur hún enn yfir mér og spyr mig aftur. Ég segi að kannski hafi ég verið eitthvað stressuð en ég sé ekki vön því að keyra hratt um hverfið. Þá ítrekar hún þetta og ég fer bara inn í bíl og keyri burt. Þessi kona býr í sömu lengju og ég, svo ef ég væri hún hefði ég vandað fyrstu kynnin aðeins betur og farið öðruvísi að. Í fyrsta lagi er þetta algerlega ósanngjarnt því ég er ekki vön að keyra of hratt um hverfið og í öðru lagi hefði hún getað kynnt sig fyrst og bryddað svo á því í framhjáhlaupi að fólk ætti að aka varlegar um hverfið en það geri, þótt ekki væri nema barnanna vegna. Ég er þvílíkt móðguð. Ekki það að maður gleymir sér stundum, viðurkenni það, en þetta var ekki sanngjarnt.

Maðurinn sem gerir við stigann minn

2007-06-28T07:33:00.000-07:00

Hann kom í dag...tilbúinn með græjurnar að ráðast á stigadjöfulinn. Vonandi nær hann að særa alla illa anda úr þessum stiga sem gert hefur okkur lífið svo leitt að undanförnu.
Trésmiðjan kemur og fer og kemur svo ekki lengi. Þeir eru búnir að vera að dútla í þessu í mánuð...en sem betur fer ekki mikið eftir. Er MJÖG ánægð með það sem komið er. Semsagt allt gott að frétta úr húsinu.
Alexander er að jafna sig.
Kristófer fór í fimm ára afmæli aleinn í gær og skemmti sér konunglega.
Og hvað á að segja um elsku Þorgeir...jú hann er tveggja ára. Þið sem þekkið til vitið hvað það merkir...

Jólahjól eða þannig sko

2007-06-22T07:44:00.000-07:00

Hjóladagarnir miklu eru komnir og farnir í leikskólunum hjá strákunum. Við náðum ekki að kaupa hjól fyrir hjóladaginn hjá Kristófer, en honum tekst hvort eð er alltaf að stela sér einum og einum hjólatúr þar sem hann nær í hjól. Ég veit ekki hvenær hann byrjaði að læra að hjóla, hann fór að prófa hjól niðrí leikskólanum á Stúdentagörðunum svona tveggja ára eða svo. Hann er því alveg sjálfhjólandi í dag, engin dramatík í gangi að sleppa þar. Kemur þegar hann hættir að nota hjálpardekkin kannski. Þorgeir er ekki alveg jafn öruggur, enda tveir gjörólíkir karakterar þar á ferð. Hann kann ekki fótstigin en prófar aðeins. Hann vildi að minnsta kosti ólmur fá hjól líka og pabbi varð ljúfur við þeirri bón.

Amma er í heimsókn hjá mömmu og pabba líka, svo það er mikið fjör í Þingásnum, sannkölluð stórfjölskylda samankomin þessa dagana. Strákarnir una sér vel í mannmergðinni, nóg af athygli þar. Þorgeir laumast stundum upp í rúm til afa og Kristófer kúrir hjá pabba.

Flutt...

2007-06-18T08:27:00.001-07:00

...inn til mömmu!
Jæja þá erum við búin að flytja allt dótið okkar úr Andrésbrunni, þrífa og afhenda. Ég skal segja ykkur það að þetta var talsvert meiri vinna en við gerðum okkur í hugarlund. Það er eins og það sé ekki nóg fyrir mann að stækka við sig í hvert skipti sem maður flytur, maður kaupir greinilega dót til þess að fylla hvern krók og kima líka. Við notuðum heilan dag um síðustu helgi til þess að flytja dót og fluttum svo næstum allan afganginn núna á laugardaginn, sem var talsvert meira en við héldum. Við vorum að til miðnættis að pakka niður og ferja, þrátt fyrir að vera með stóran sendiferðabíl á leigu. Frikki kom og hjálpaði með fyrstu sendinguna og Sigga og Gummi skutust til að hjálpa með þá seinni þrátt fyrir að vera á leið í útskrift, takk Sigga og Gummi þið björguðuð okkur! En svo hélt stritið áfram þangað til við gátum ekki meir. Svo við geymdum smá dót þangað til næsta dag en þá ætluðum við að strjúka yfir allt. Einhvern veginn var þetta smádót bara slatta mikið dót og þrifin tóku drýgri tíma en útlit var fyrir. Við lukum verkinu um hálfníu, afhentum lyklana að íbúðinni og fórum svo á læknavaktina með Alexander. Það heyrðist gífurlegt urg og sarg í honum og hann átti erfitt með öndun. Lækninum leist ekki nógu vel á þetta svo hann sendi okkur á bráðamóttökuna þar sem litla krílið fékk friðarpípu og stera. Við vorum komin heim rúmlega tólf eins og kvöldið áður og allir pínu þreyttir. Kristófer og Þorgeir sváfu hjá ömmu og afa....en þeir voru þar alla helgina. En ég er ekkert smá ánægð að þessi kafli er búinn...þá er næsti kafli eftir eða að þrífa og ganga frá í Sóleyjarima. Ég get nú bara ekki hugsað svo langt án þess að fá hroll....

Draumnum seinkar

2007-06-15T15:39:00.000-07:00

Það lítur ekki út fyrir það að við séum að flytja inn í Sóleyjarima á næstunni. Það á eftir að laga stigann og þegar það er búið (en ég held ekki í mér andanum á meðan ég bíð eftir verktökunum) þá á eftir að setja upp handriðið. Fyrr flytjum við ekki.
En það er rífandi gangur í tréverkinu. Smiðurinn hann Kristján er að verða búinn að setja upp eldhúsið og það er klikkað flott...set inn myndir fljótlega. Það er líka búið að setja hurðarnar upp og það var byrjað að setja upp innréttinguna á baðið uppi í dag.
Í morgun var sumarhátíð hjá strákunum og ég kom með þeim í skrúðgöngu. Svo fórum við Alexander en strákarnir grilluðu pylsur...set inn myndir fljótlega af þessu líka.
Alexander var mjög pirraður í dag og grét mikið. Mamma hans er að gera hann vitlausan á öllu þessu flandri út um allt, alltaf að kaupa og skoða í húsið. Í dag þurftum við að kaupa húna á hurðarnar, velja hanka á eldhúsinnréttinguna og kaupa vask og blöndunartæki...allt á sitthvorum staðnum. Það var þreyttur og útgrátinn gutti sem sofnaði með mömmu sinni í stóra rúminu hennar í dag...hjartað mitt var að springa þegar hann grét sem mest. En ég held að hann hafi jafnað sig greyið og við hvíldum okkur vel á meðan pabbi fór með hina strákana til læknisins og svo fóru þeir að panta mælingu á borðplötuna í eldhúsið.
Þegar það var búið fóru þeir í Hagkaup að versla, en það er mikið í uppáhaldi hjá litlu mönnunum. Pabbi þeirra leyfir þeim að vera með sitthvora litlu kerruna og svo fá þeir að tína það sem pabbi kaupir í þær og hjálpa pabba. Hann sleppur þannig við að keyra kerru sjálfur...barnaþrælkun??? Hahaha.....

Og þá vorum við tvö...

2007-06-14T01:19:00.000-07:00

Með ömmu á leikvellinum á Álftanesi einn góðviðrisdag í lok maí...

Slakað á á Laugarvatni í besta veðri sem við höfum fengið í júní.
Alexander krúttí. 9.920 kíló og 69 sm.
Skóálfurinn....

Ákvað að senda Þorgeir í leikskólann í dag, þótt hann sé svolítið kvefaður ennþá. Hann var orðinn mjög leiður á að hanga heima og var einungis með 38 stiga hita á mánudaginn. Hins vegar er hann með eyrnabólgu...sem er samkvæmt lækninum að ganga niður og hann vill fá hann í skoðun á morgun frekar en að setja hann á sýklalyf.

Svo við Alexander erum ein heima og ég verð að viðurkenna að það er frekar tómlegt hérna núna. Það er notalegt að hafa hina guttana nálægt þótt lætin í þeim stigmagnist eftir því sem líður á daginn...

En Alexander fær þá kannski smá athygli.

Sumarið er komið!

2007-06-12T09:37:00.000-07:00

Kortéri eftir að ég kvartaði undan íslenska sumarveðrinu í gær fór sólin að skína. Það var að vísu ekkert sérstaklega hlýtt, en veðurguðirnir hafa sannarlega bætt úr því í dag. Sólin skín sem aldrei fyrr, vind hreyfir ekki og úti er steikjandi hiti. Mæli með því að hafa loftkælinguna á í bílnum, sé hún til staðar. Ég sá Snæfellsjökul svo skýrt að mér fannst ég geta rétt út hendina og snert á honum.
Þorgeir er heima í dag líka. Hann var ekkert hress með það þegar hann vaknaði og ég set hann aftur á leikskólann á morgun. Hann var líka bara með 38.2 stiga hita mest í gær og alveg hitalaus í dag.
Ég fór í Þjóðskrána og breytti heimilisföngunum okkar, hefði kannski frekar átt að setja lögheimili okkar í Þingásinn, eigum örugglega eftir að verða þar í góða stund áður en við getum flutt í Sóleyjarimann.

Sól, sól skín á mig....

2007-06-11T03:10:00.000-07:00

Ég nýt þess að liggja á sólbekknum og sleiki hlýja sólargeislana, ég næ mér í ískalt hvítvín og góða samloku með salati og laxi. Mér er orðið ansi heitt, ég verð að stökkva í sturtuna og kæla mig niður með ísköldu vatni....íslenska sumarið er óviðjafnanlegt. Ætli það sé svona hlýtt fyrir norðan? Ég veit ekki alveg hvað hitinn er hár, giska á svona 26 gráður á celcius, hefur áður verið svona hlýtt í Grafarholtinu? Ekki síðan bygging hófst á svæðinu hugsa ég...og verður líklega aldrei. Raunveruleikinn er sá að ég sit hér í sófanum í hálftómri stofunni, en við fluttum megnið af búslóðinni í Sóleyjarima á laugardaginn, þrátt fyrir að langt sé í land að klára framkvæmdir þar. Það er í kaldara lagi úti miðað við að það sé 11. júní og skýjað. Alexander er í leikgrindinni sinni að horfa á Derek sem útskýrir hegðun drauga í hinum ýmsu bæjum á Englandi mjög fjálglega. Þorgeir er heima í dag því hann er veikur og hann hefur æst upp í öfugu hlutfalli við lækkun hitans eftir að hann fékk hitastíl. Hann er búinn að vera að sparka í mig og hlaupa um, en er nú frammi í gangi að flippa með skófatnaðinn, hann er með "shofetish" á háu stigi og ég býst við því að hann vinni í skóbúð á Manhattan í framtíðinni og selji fínum frúm hátískuskó og stígvél. Kristófer fór í leikskólann í dag, það er íþróttadagur og hann var mjög vonsvikinn af því að íþróttaálfsbúningurinn er óhreinn síðan hann var að tína orma í garðinum hjá ömmu Heiðu í gær. Ég heyri skruðninga, Þorgeir er kominn á kaf inn í skápinn frammi á gangi og er að róta öllu til...ég nenni ekki að skipta mér af honum, Alexander er sofnaður og ég veit að ef ég tek Þorgeir úr skápnum fer hann að öskra og hlaupa um og vekur litla barnið.
Við fórum í bíltúr í gær, keyrðum aðeins austur og skoðuðum bústaðalönd og létum okkur dreyma. Við stoppuðum stutt á Laugarvatni og ég set inn myndir bráðlega....alllar græjur til að hlaða inn myndum eru í Sóleyjarima. Þar var gott veður...heitt og logn. Go Laugarvatn!
Næstu helgi verðum við að vera flutt...svo við verðum víst að flytja til ömmu á meðan. Það verður fjör þar á næstunni!
Sem betur fer er Kjartani farið að langa að skreppa eina helgarferð í sumar svo ég vonast til að við skreppum í tvær nætur til einhverjar skemmtilegrar Evrópuborgar og drekkum kaffi og slöppum af í sólinni í smástund, Alexander kæmi að sjálfsögðu með en hinir grallararnir yrðu heima hjá ömmunum sínum. Ég þarf líka sárlega að komast í HM og versla aðeins fyrir strákana, fötin eru gjörsamlega að eyðast upp, enda duglegir að leika sér!
Jæja krossa puttana og vonast eftir kraftaverki! Er orðin ansi leið á veðrinu hér og endalausu veseni með iðnaðarmenn og verktaka....svo ég tali nú ekki um starfsfólk í gardínubúðum með ENGA þjónustulund. Best að segja ekki meira um það á þessari stundu.
Eigið góðan dag og reynið að njóta ykkar í sólarleysinu...þið sem eruð erlendis í betra loftslagi, hugur minn er hjá ykkur!

Til hamingju með afmælið Brynja!

2007-06-06T14:34:00.000-07:00

Góða kvöldið.

Ég reyndi að hringja í Brynju til að óska henni til hamingju með daginn...en það svaraði bara einhver fúll Þjóðverji. Asvananan...eitthvað svoleiðis var það sem hann sagði og það var það eina sem ég fékk upp úr honum. Endaði með því að ég lagði á, nennti ekki að vera að eyða afsökunarbeiðni í þennan andskota. En semsagt, til hamingju með afmælið elsku Brynja mín. Ég virðist ekki vera með réttan gsm síma hjá þér og myndi meta það mikils ef þú sendir mér símann þinn í emeili. En njóttu dagsins dúllan mín.

Dagurinn fór í læknastúss hjá mér, alltaf að tékka á einhverju. Þegar maður er orðinn svona gamall og hrukkóttur fer maður að verða paranoid um að allt sé að fara til fjandans þegar maður finnur einn og einn hnúð. En so far so good. Reyndar fór ég til tanna líka og það er ekki hægt að segja að ég sé í góðum málum þar. Ég er í góðum höndum auðvitað, en það er allt að hrynja í munninum á mér. Hver rótfyllingin á eftir annarri, tennur sem brotna, krónur á leiðinni og implönt á dagskránni. Guð minn góður, hvað var ég að spá? Af hverju notaði ég ekki oftar tannþráð og sleppti öllu súkkulaðinu og kökunum??? Sem hefði kannski leitt það af sér að ég notaði skemmtilegra fatanúmer. En við skulum ekki tala meira um það.

Íslenskt sumarveður

2007-06-05T08:24:00.001-07:00

Ég sit inni í rólegheitum. Skrapp út í dag og var að sinna nokkrum smá-erindum, en var fegin að komast aftur inn í hlýjuna. Nú sit ég semsagt við tölvuna og hlusta á rokið og rigninguna sem ræður ríkjum úti fyrir. Það er samt ekki eins notalegt og þegar maður er í einbýlis- eða raðhúsi þar sem maður heyrir rigninguna berja þakið. Í fjölbýlishúsi er takmarkað hversu mikið maður heyrir því maður er svo vel dúðaður af veggjum...
En það er að komast niðurstaða í stigamálið, hann verður ekki tekinn niður þar sem það er of mikið mál (þyrfti að taka hann niður með loftpressu, með tilheyrandi látum), en í staðinn verður hann tekinn eitthvað í gegn, styrktur og múraður upp á nýtt.
Ég er ekki búin að ákveða mig enn með gardínur, off-white, ljósgráar (virka eins og hvítar) eða beige??? Hvað finnst ykkur? Er beige eins og það sé búið að reykja í 30 ár í húsinu, það sagði kallinn í gardínubúðinni þegar ég spurði hann útí beige (sem ég var þá eiginlega búin að ákveða að taka ehem). By the way, leðurstólarnir okkar eru beige...hvað er annars beige á íslensku, já það er semsagt drapplitaður/eða ljósbrúnn. En ég er að tala um alveg ljós-ljós-ljósan!!!!
Það er semsagt lítið að frétta, jú búin að panta sorptunnu og kallarnir í trésmiðjunni skrópuðu í dag og í gær svo eldhúsið tefst enn....

Það má alltaf reikna með nokkrum aukamánuðum þegar maður tekur við húsi sem er tilbúið til innréttinga. Sérstaklega þegar maður fær það rétt fokhelt!!

Oh, mig langar svo í eina viku til Tyrklands...skoða Pamukale og Ephesus...slaka á, borða vel og versla teppi. En.....

Njótið dagsins!

Afmælið mitt og fleira skemmtilegt í lok maí/byrjun júní

2007-06-01T15:41:00.000-07:00

Váááá......

Sjáið bara hvað ég á rómantískan mann! Ég fékk nafnlausa rósasendingu á afmælisdaginn og var hálf ráðvillt. Hélt kannski að hún hefði verið frá leynilegum aðdáanda...en Kjartan sannfærði mig um að hann hefði sent hana...damn. Jæja, við örvæntingafullu húsmæðurnar látum okkur bara dreyma áfram. En án gríns þá var þetta rosalega gaman og lífgaði sannarlega upp á hvunndaginn!

Alexander krútt á leiðinni í bað.

Þorgeir og Kristófer 31. maí...ansi þreyttir og ekki í stuði til að brosa fyrir myndavélina...

En þá er maí liðinn, þetta hefur verið ágætis mánuður, bjartur og fínn. Ekki mjög heitur en þetta stendur allt til bóta er það ekki? Verður víst meðalsumar hér á Fróni...
Við erum ekki á leiðinni til Tyrklands eða Spánar til að fá hita í kroppinn að þessu sinni...fáum rushið frekar í hvert sinn sem við förum í bygginga- eða heimilisvöruverslanir og kaupum inn fyrir Sóleyjarima...
Það sem er að frétta af þessu draumaverkefni okkar er annars það að eldhúsinnréttingin er á fullum swing, kom smá babb í bátinn í dag þegar þurfti að laga staðsetningu á nokkrum tenglum áður en smiðurinn gat haldið áfram, en við höfðum bara samband við handlaginn.is sem voru ekki seinir á sér að redda rafvirkja.
Það getur verið að það verði að skipta um stiga, gæti verið erfitt í framkvæmd en allir eru sammála um að hann sé ekki alveg eins og hann ætti að vera. Það kemur í ljós á mánudaginn hvernig þeim málum verði reddað...
En annars óska ég ykkur öllum bara innilega gleðilegrar helgi, ég verð að skottast með strákunum mínum á meðan pabbi fer að klára að leggja parketið með afa. Stuð!!!!

Karlmenn eru allir eins...

2007-05-31T08:00:00.000-07:00

...þegar kemur að klósettvenjum. Komon, hvað er þetta með að pissa á nýja fína klósettið mitt í Sóleyjarima og láta það svo bara vera þar og harðna og úldna??? OJ. Klósettið bara skilið eftir opið og svo kemur næsti og pissar oní gamla pissið...
Já verði ykkur að góðu því ég ætla ekki að hreinsa upp eftir ykkur iðnaðarmannakallar...ég kem ekki með ajaxið fyrr en allt er um garð gengið.
Hvern er ég að plata? Ég get ekki beðið eftir að arka upp eftir með oxygelið og spreyja hvern krók og kima á klósettskálinni og þurrka svo vel á eftir.
Ætli þeir myndu skilja hintið ef ég léti oxy-þurrkur á stól við hliðina á klósettinu???

Englarnir gráta í dag...og ég með.

2007-05-29T09:36:00.000-07:00

Á vef mbl segir frá því að í dag hafi 8 mánaða gamalt barn fundist hangandi í snöru en þó á lífi í hjólhýsahverfi í Texas, en skammt frá fannst móðir þess og systkini, 5, 3ja og 2ja ára öll látin. Mér er orða vant...

Ævintýradagur án mikillar fyrirhafnar

2007-05-26T17:35:00.000-07:00

Kjartan og tengdapabbi fóru að leggja parketlista í húsinu í dag, svo ég og strákarnir fórum í bíltúr og leituðum uppi ævintýri. Fyrst fórum við til ömmu Heiðu þar sem Kristófer spilaði á Spidermanspil við ömmu,

Þorgeir Sölvi keyrði um allt á tryllitækinu á myndinni,

og Alexander náði að slaka svolítið á í ferðarúminu sem hér sést.

Að því loknu fórum við til ömmu Guðfinnu þar sem við vorum í góðu yfirlæti fram á kvöld. Kristófer fékk að fara með ömmu í Bónus því hann er svo stór og stilltur og Þorgeir var ekki mjög ánægður með það. En brúnin lyftist þegar afi mætti á svæðið með Sleipni og litli hestamaðurinn fékk að fara á bak!

RapeLay

2007-05-24T01:24:00.000-07:00

Já nú er nýjasta æðið í tölvuleikjunum komið á sjónarsviðið, leikur sem virkar svo spennandi að ég get ekki beðið eftir því að strákarnir mínir fái tækifæri til þess að spreyta sig á honum og fleiri álíka leikjum. Í þessum firrta heimi er nauðsynlegt að viðkvæmar barnssálir fái tækifæri til þess að æfa sig í að nauðga, drepa og meiða. Í fyrrnefndum leik er fjallað um ævintýri söguhetjunnar chikan (öfuguggi á japönsku), en hann hefur það fyrir sið að káfa á konum í yfirfullum neðanjarðarlestum. Ein konan vísar lögreglunni á hann eftir að hafa orðið fyrir barðinu á honum. Í kjölfarið tekur hann að hefna sín og nauðgar konunni sem kærði hann auk systur hennar og móður. Þegar hann er búinn að nauðga þeim öllum getur hann óhindrað haldið áfram að nauðga þeim hvar og hvenær sem er og þar sem búið er að sigra þær geta þær ekki neitað því að taka þátt í þeim kynlífsathöfnum sem hann vill.
Já þetta er eitthvað fyrir unga og upprennandi karlmenn og unglingspilta. Frábær boðskapur í saklausu formi. Og lögreglan er að skoða þetta. Gott hjá henni. (Á vef mbl.is í dag.)

Sunnudagur til sælu

2007-05-20T02:14:00.001-07:00

Góðan daginn.
Hér á bæ er vaknað um fimm- sex leytið og farið á fætur um sjö, efast samt um að allir séu jafnheppnir eða þannig. Ég held að enn finnist týpur sem þurfa ekki að vakna fyrr en um kannski tíu eða jafnvel ellefu. Bara ef ég væri ein af þeim....ennþá!!!
En hér er nýjasta myndin af liðinu mínu. Ég held að ég sé búin að standa mig nokkuð vel og tilkynni hér með að ég er hætt. Í bili að minnsta kosti...

Allir þreyttir

2007-05-19T03:35:00.000-07:00

Ég veit það. Ég er langlang...sætastur í öllum heiminum!

Kjartan er á leiðinni út með strákana í enn eina byggingavöruverslunina. Hann verður örugglega eitthvað að vinna í húsinu í dag og ég með strákana. Það eru allir mjög þreyttir og það gengur mikið á...Ég veðja á að sumir sofni mjög fljótlega eftir að komið er út í bíl!
Ég er búin að opna nýjan link fyrir neðan myndalinkinn. Þar ætla ég að setja inn jólakortin og skrappsíðurnar sem ég er að skapa mér til ánægju og yndisauka þegar ég hef tíma. Vona að þið hafið gaman af. Stefni svo á að setja inn myndir í photos á eftir...
Hafið það gott í dag.

Krakkakot

2007-05-18T01:49:00.000-07:00

Já það er fjör í kotinu þessa dagana. Enginn leikskóli og íbúðin er eins og sprengjusvæði! En þetta er gaman. Þorgeir er búinn að sofa tvær nætur í röð inni hjá mömmu. Í fyrrinótt þorði ég ekki annað en að hafa hann af því að hann rotaðist næstum því á stofuborðinu og í nótt vaknaði hann við miður skemmtilegan hund sem ruddist inn í draumaheiminn hans. Þegar mamma svo kom inn þá trylltist hann, hélt ég væri hundurinn eða eitthvað.
Við fengum múrara til að klára baðherbergin og setja upp tækin. Það fara að koma innréttingar og hurðar og okkur langaði bara að klára þetta einn tveir og tíu! Það er frábært að sjá hvað þetta er flott gert hjá Jóni, Kjartani og Frikka...það sést þegar fúgan er komin á veggina og allt lifnar við. Þetta er samt ekki búið en komið langt á veg enda mest frágangur eftir.
Kjartan er svo búinn að vera að dútla við stigann svo það sé hægt að fara að setja handriðið upp. Mig grunar að við ættum að geta flutt inn skömmu eftir mánaðarmót. Enda verðum við að fara að drífa okkur. Megum vera hér í síðasta lagi til 17. júní og tíminn er fljótur að líða.
Jón og Gunna eru að fara til Halifax á morgun! Versla, versla, versla.....það verður stuð hjá þeim.
Við sitjum eftir og reynum að skemmta okkur yfir nýjustu tíðindunum í pólitíkinni. Björn Bjarnason blótar Jóhannesi í Bónus, Árni Johnsen er að fara á þing eftir að hafa rænt alla þjóðina í beinni útsendingu og setið á hrauninu fyrir og Ingibjörg Sólrún er að fara að sjá langþráðan draum rætast. Hvað gæti verið skemmtilegra en það???????

Sóleyjarimi...parketlagður

2007-05-12T18:29:00.000-07:00

Var búin að lofa myndum af parketinu í slotinu okkar, voila:

Hjónaherbergið
Gangurinn við útidyrnar og helmingurinn af stofunni.
Og ég verð að fá að vera með af því að ég er svo geðveikt sætur að reyna að sjúga snudduna!

Risessan í Reykjavík

2007-05-12T08:45:00.000-07:00

Strákarnir fóru í sveitarferð með pabba sínum í dag og mamma var heima með litla kút. Það var auðvitað svaka stuð og farið á hestbak og fleira til gamans gert.

Júróvisíón bömmer...aftur

2007-05-11T02:50:00.000-07:00

Af hverju fá ekki öll löndin að taka þátt á laugardaginn?
Þetta er bara niðurlægjandi og asnalegt. Ef þetta á að heita Júróvisíon með rentu þá fá allir að vera með...bannað að skilja útundan.
En það er fyndin þessi umræða með austur-evrópu löndin. Sumir segja klíka, aðrir segja að það sé ofsóknarbrjálæði. En komon, eina landið sem komst áfram í gær sem ekki tilheyrði austur-evrópu var Tyrkland. KOMON!!!

Formlega viðurkenndur risi...

2007-05-08T06:06:00.000-07:00

Er maður ekki formlega orðinn svolítill risi, þegar maður fær auka skoðun á heislugæslunni til þess að fylgjast með vigtinni á manni? Á að mæta eftir mánuð aftur...

(Sætastur í buxunum frá Brynju "frænku".)
Mamma er svolítið hrædd um það!
Þegar
Kristófer var þriggja mánaða var hann:
7.260 kg og 63.5 sm
Þorgeir var fjögurra mánaða var hann 7.015 kg og 66 sm.
Núna er ég orðinn rúmlega 3ja mánaða (+ein vika) og ég er:
9.090 kg og 65.5 sm!!!

Búið að parketleggja!

2007-05-07T02:17:00.000-07:00

Ofurmennirnir eru búnir að parketleggja! Já Frikki, Toggi og Kjartan kláruðu að parketleggja í gærkvöldi...enda eru þeir með marða putta, harðsperrur og slitnar sinar! En allt sem hægt var að klára er semsagt komið, það vantar örfáa borða í eldhúsið sem ekki er hægt að leggja fyrr en sökklarnir undir eldhúsinnréttinguna eru komnir og svo verða listarnir settir eftir að búið er að koma hurðunum fyrir. Það fer að styttast í þær og eldhúsinnréttinguna, tíminn líður ótrúlega hratt. Þeir áætla að byrja á uppsetningu 20. maí! Þá þurfum við að fara að ákveða hvaðan við ætlum að fá borðplötu, en það tekur að minnsta kosti 2 vikur að sníða hana til.
Jæja, ég reyni að setja inn myndir af húsinu í dag. Bestu kveðjur frá Guðbjörgu, Alexander og Þorgeiri sem er með einhvern leiðindahósta og er því heima í dag!

Strákapör

2007-05-04T01:45:00.000-07:00

Kristófer minn er heima hjá mömmu...að minnsta kosti næsta klukkutímann. Hann sat á rúmstokknum í sakleysi sínu í morgun og var að klæða sig í fötin sín, þegar Þorgeir óviti SPARKAÐI honum úr rúminu! Og ég horfði á og gat ekkert gert nema öskrað! Ótrúlegt, ég er enn að jafna mig. Að vísu held ég að við höfum sloppið vel, en ég þori ekki annað en að vera viss og fylgjast með....þessir strákar!

allt á fullu

2007-05-03T11:22:00.000-07:00

Ryksugan hefur verið á fullu síðustu daga ef svo mætti að orði komast. Kjartan, pabbi hans og Frikki vinur hans hafa verið á fullu að parketleggja, svo húsið er að breytast mikið þessa dagana. Það er langt komið uppi eins og sést á þessum myndum og ætlunin er að reyna að komast niður og klára þar um helgina...

Þetta er sjónvarpsholið uppi...

Þetta er annað strákaherbergið...
Sjáum til hvernig gengur. Á meðan hef ég haft í fullu fangi með strákana, en með góðri hjálp frá ömmu Guðfinnu og ömmu Heiðu. Ekki finnst strákunum það heldur leiðinlegt að vera hjá ömmunum sínum.

En við Alexander biðjum bara að heilsa, góða helgi!

Íþróttaálfur með bleika snuddu

2007-04-26T08:37:00.000-07:00

Litlu ungunum okkar leiðist stundum að hanga heima...sérstaklega í heila viku!!! Þess vegna er gott að hafa upp á ýmsa afþreyingu að bjóða, liti, perlur, kubba og fleira. En í dag sló ég alveg í gegn. Ég átti íþróttaálfsbúning uppi í skáp sem ég keypti handa Kristófer á öskudaginn, en þar sem krakkarnir voru allir látnir búa til sína eigin búninga þá var ég aldrei búin að gefa honum hann og var heldur ekki búin að kaupa annan búning fyrir Þorgeir. En ég tók hann upp úr pakkanum í dag og leyfði honum Þorgeiri að leika sér í honum og það var mikil gleði í kotinu þegar hann sá hann. Kristófer verður líklega ekki ánægður að sjá bróðir sinn í íþróttaálfsbúning og fá ekki sjálfur...en það er seinna tíma vandamál sem verður leyst bráðlega!

Skarlatssótt

2007-04-26T03:42:00.000-07:00

Jæja, Þorgeir nýbúinn með pensillín skammtinn sinn við skarlatssótt, þegar hann fær hana aftur. Hann er búinn að vera með hita og útbrot og svo fór hann meira að segja að gubba í gærkvöldi. En þið sem eigið litla stubbalinga, ef barnið fer að fá útbrot sem líta bara út eins og ofnæmi fyrir þvottaefni og barnið fær engan hita, endilega látið samt athuga barnið, útbrotin geta verið einu einkennin. Ef þið skoðið tunguna er líklegt að hún sé svolítið rauð og þrútin og jafnvel rauðar skellur í miðjunni. Þetta er svokölluð jarðarberjatunga sem fylgir þessum sjúkdómi. Tek það fram að þessi mynd er ekki af barninu mínu, heldur fékk ég hana að láni á vefnum!

Hæ hó jibbí jei og jibbí jei...ekki fyrr en 17. júní!

2007-04-25T06:03:00.000-07:00

Við erum búin að fá seinkun á að afhenda Andrésbrunn...þurfum ekki að afhenda fyrr en 17. júní, svo við sleppum kannski við að leggja heimili foreldra minna undir okkur!
Já þetta er allt að koma. Búin að panta allt það helsta, Kjartan og pabbi hans fara vonandi að parketleggja um helgina og Jón hennar Gunnu systur kemur og klárar að flísaleggja í byrjun maí. Erum með toppfólk í öllum stöðum!

Bangsaveisla!

Þorgeir fékk Dísu heim á mánudaginn...

og svo fékk Kristófer Tuma með heim á þriðjudaginn.

Svo það er búin að vera sannkölluð bangsaveisla hérna í vikunni! Annars er Þorgeir litli búinn að vera hálfveikur svo hann er búinn að vera heima hjá okkur Alexander.

Ég ætla að enda á að setja mynd af uppáhaldsfrænkunni með strákunum sínum:

Brynja

2007-04-20T06:49:00.000-07:00

Ég á yndislega vinkonu sem heitir Brynja. Hún var í heimsókn hjá mér í morgun og við það tækifæri tók ég nokkrar myndir af henni með Alexander mínum:

Því miður á hún heima í Þýskalandi, svo það var mikil hamingja að frétta af henni hér á landi og sjá hana í smástund...en það er auðvitað setið um hana þegar hún sést á klakanum!
Takk fyrir morgunstundina elsku Brynja mín, það var æðislegt að hitta þig!

Súkkulaðigosbrunnur eða forboðin fegurð?

2007-04-18T02:19:00.000-07:00

Það hefur vissa kosti að vera heimavinnandi húsmóðir og gott að geta átt kost á því. En það getur hins vegar haft sína ókosti líka, til dæmis er sjónvarpsefnið sem í boði er á morgnana oft ansi óáhugavert. Núna stendur til dæmis til boða að horfa á suður-amerísku sápuóperuna Forboðin fegurð eða vörutorg, óstöðvandi tónlist eða umræður á alþingi. Get varla valið. Sá hins vegar svo flottan súkkulaðigosbrunn á vörutorginu, mig hefur vantað svona alla ævi og ég vissi það ekki einu sinni. Hver vill ekki hafa gosbrunn úr súkkulaði í sínu matarboði, einungis 5.990 krónur???
En að öðru, sá þessa sniðugu síðu á einu blogginu:

http://morph.cs.st-andrews.ac.uk/Transformer/index.html

Hérna getið þið breytt ykkur á ýmsan hátt en mér þótti einna forvitnilegast að sjá mig sem svarta konu. Ég vissi að það væru einver leyndarmál í skápnum, ég breytist ekkert nema bara á litinn! Mamma hvaðan kom þetta nef eiginlega?

Framkvæmdir

2007-04-15T02:48:00.000-07:00

Jæja þá er búið að taka niður vegginn, þar sem áður var geymsla uppi á efri hæðinni. Og voila: Flott sjónvarpshol!!!

Við erum voða ánægð með útkomuna enda nóg pláss til að setja drasl þótt maður taki ekki allt þetta rými í það.
Set eina, tvær dúllumyndir af Alexander með. Hann vex svo hratt að hann er sífellt að breytast. Hann er orðinn rúmlega 8 kíló aðeins 2ja og hálfs mánaða gamall!
Hafið það gott um helgina!

Sumar

2007-04-12T14:13:00.002-07:00

Loksins, loksins!
Það er farið að vora. Ég veit að það hefur verið rysjótt veður að undanförnu, en það birtir líka mun fyrr á morgnana og sólin lýsir upp íbúðina okkar. Hún er venjulega svolítið dimm en nú þarf maður að fara að draga gluggatjöldin fyrir þegar sólin skín sem skærast. Annars fer að styttast í að við flytjum í fína húsið okkar í Sóleyjarima....Við þurfum að fara úr Andrésbrunni 17. maí en það verður ekki allt komið í lag í nýja húsinu þá. Eldhúsið verður til dæmis ekki sett upp fyrr en 22. maí og þá á eftir að setja upp borðplötu líka og ganga frá eldhústækjunum. Gaman, gaman! Það verður sko innflutningspartí í sumar þar sem tollurinn okkar verður á boðstólum!!!

Nýjar myndir/New fotos

2007-04-11T10:26:00.000-07:00

Ég er alveg að gefast upp á þessu bloggi...ástæðan fyrir því að ég hef ekki skrifað neitt í langan tíma hefur verið að bloggsíðan er alltaf að detta út og eftir að ég hef skrifað heila ritgerð vill hún ekki birta það!
En vonandi er þetta eitthvað tímabundið...
Jæja, þá eru páskarnir liðnir og hversdagsleikinn tekinn við. Fyrir páska komu Jón og Gunna með krakkana sína og Jón hjálpaði Kjartani með ýmislegt í nýja húsinu.

Alexander Goði á páskadag.

Góðir bræður.

halló aftur

2007-04-11T09:22:00.001-07:00

Alexander Goði

2007-02-15T09:38:00.000-08:00

Svefnsýki

2006-10-28T11:54:00.000-07:00

Sæl öll sömul.

Ég hef ekki skrifað neitt í langan tíma svo ég veit ekkert hvort neinn nenni
lengur að kíkja á síðuna mína. En það verður bara að hafa það. Það gerist svosem
ekkert spennandi hérna. Ég er alltaf að reyna að læra en geri mest af því að
sofa. Ég er alltaf svo þreytt...
Það er farin að færast spenna í skólann. Einungis mánuður eftir og verkefnin
hlaðast upp í hrönnum. Ég er ekki alveg komin í gír að sinna þessum þætti
lærdómsins...ekkert frekar en að lesa og mæta í tíma svo ég verð að fara að
taka mig á. En þetta er gaman samt sem áður. Svo ég verð nú að fara að halda mig
við efnið. Kjartan er bara að spila svo mikið af jólalögum að maður vill helst
vera bara í jólafíling en ekki að læra...
Litli frændi verður skírður um næstu helgi, 4. nóv. Það verður gaman að vita hvaða
nafn hann mun bera þetta litla sæta kríli.
Jæja, vona að allir hafi það gott.

Með bestu kveðjum,
G.

Slakað á í Alicante

2006-10-02T02:05:00.000-07:00

Það var yndislegt í Alicante og sjálfsagt að mæla með þessum stað. Þó myndi ég ráðleggja fólki að að leigja sér bíl, þá er lítið mál að ferðast um allar trissur enda er auðvelt að keyra þjóðveg N-332 meðfram ströndinni og þaðan er hægt að ferðast inn í landið til ýmissa áhugaverðra staða.
Strákarnir skemmtu sér konunglega eins og alltaf þegar þeir eru í sól og yl. Skemmtilegast fannst þeim í sundi, en þeim fannst líka gaman á ströndinni. Sérstaklega þó Kristófer sem er eins og kóngur í sjónum, óttalaus og orkumikill eins og lítið ljón.
Litli kallinn var rólegri í tíðinni en skemmti sér engu að síður vel. Þeim fannst ekkert voðalega gaman að hanga lengi í kerrunum eða labba um....
En nú er maður semsagt kominn heim og er búinn að vera í aðlögun. Ég er að reyna að koma því í verk að læra og vona að það takist. Ég er komin í smá vandræði með að ná skilafresti á verkefni og það er spennandi að sjá hvernig til tekst....
Hafið það sem allra best!

Sóley og Kristófer á leiðinni í Mundomar.
Eftirminnilegasta atvikið var að hitta þennan fallega gíraffa í Ríó Safari dýragarðinum.

Toggi litli fylgist grannt með gæsunum.

Allt er þegar þrennt er!

2006-09-10T04:27:00.000-07:00

Já það er drengur á leiðinni. Hér sést hann veifa til heimsins.

Áætluð lending er 25. janúar 2007 en nákvæm tímasetning er ekki til staðar.
Bestu kveðjur!

Things that make you go hmmmm......

2006-08-31T16:25:00.000-07:00

Hvað er málið með bílastæðasjóð og blíb gaurana sem vinna við að sekta og innheimta sektir???
Ég lenti í því um daginn að tölvustýrður kassi sem prentar út miða fyrir bílastæðin, taldi 300 kallinn sem ég setti inn sem 25 kall og ég fékk þar af leiðandi heilar 10 mínútur fyrir ómakið. Ég reyndi strax að hringja í bílastæðasjóð en þar var lokað, svo ég fór í klippingu og þegar ég kom út var ég auðvitað búin að fá sekt. Ég hringdi aftur og var beðin um að skrifa greinargerð og senda embættinu sem ég og gerði. Í dag fékk ég svar og var neitað um niðurfellingu sektarinnar þar sem engin bilun hefði fundist! Ég lagði þetta semsagt allt saman á mig til þess að losna við að borga í stöðumælinn, allt út planað...ég er semsagt lygari. Já það hefur enginn gefið það í skyn við mig fyrr en í dag....
Þetta er ekki búið en ég veit ekki hvað þybbin, lágvaxin, mjóróma kona getur gert til að koma sínu fram??? Kannski get ég ráðið mér einn óheiðarlegan pólitíkus til að ganga í þetta mál gegn atkvæðinu mínu???

En nóg um það.
Kristófer strauk af leikskólanum í gær, það er víst ekki búið að ganga frá grindverkinu í kringum skólann þannig að óvitar geta grafið sér leið undir það og hlaupið út á eina mestu umferðargötuna í Grafarholtinu. Það var víst einn eldri sem skipaði Kristófer að skríða undir. Þetta mál er heldur ekki búið. Ég þakka Guði fyrir að þetta var ekki litli guttinn minn, hann hefði nefnilega hlaupið beint út á götu og ekkert stoppað. Það er náttúrulega ekkert sem getur afsakað svona framkvæmdaleysi. Enn og aftur, þá eru pólitíkusar sem ganga í að afla fjár fyrir svona framkvæmdir...gegn greiða.

Byrjaði formlega í skólanum í gær með kynningarfundi meistaranema. Þetta er svaka spennandi en verður erfitt...

Hafið það gott og ekki láta stöðumælaverðina bögga ykkur....

MADONNA Í PARÍS

2006-08-29T04:16:00.000-07:00

MADONNA Á KROSSINUM
(original photo by Guðbjörg Sif Halldórsdóttir)

Kaffi París eða kaffi í París...hvort myndir þú velja?

2006-08-23T02:13:00.000-07:00

Já krakkar mínir þá fer að koma að því! Ekki á morgun, heldur hinn...förum við Kjarri minn til Parísar. Og ekki nóg með það...eftir að hafa rölt um Champs Elysées, klifrað uppí Eiffel turinn og drukkið FRANSKT eðalkaffi og troðið sig út af FRÖNSKUM ekta croissants...er ferðinni heitið á Madonnu tónleika á sunnudeginum. Þetta er náttúrulega ekkert nema bara snilld!

Hérna sést fræga atriðið hennar þar sem hún er "krossfest" til að vekja fólk til umhugsunar á alnæmi.
Já þetta verður alveg meiriháttar. Mig er búið að hlakka svo lengi til, að ég þori varla að trúa því að þessi dagur sé að fara að renna upp!

En annars er allt annað gott að frétta líka.
Strákarnir eru byrjaðir á leikskólanum og það gengur vonum framar. Kristófer er búinn að eignast fullt af vinum og Þorgeir Sölvi fer einn út í blómabeð að skoða blómin ef krakkarnir eru eitthvað leiðinlegir, hann á sko ekki í vandræðum með að dunda sér sá drengur.
Ég fór í gær með þá að kaupa bækur fyrir skólann, en félagsvísindadeildin fer af stað 1. sept. Ég er sem betur fer alltaf í fríi á föstudögum í vetur svo ég þarf ekki að mæta fyrr en á mánudeginum 4. sept. Já mér líst vel á þetta, en ég er semsagt að fara í mastersnám í blaða- og fréttamennsku.
En ég læt frá mér heyra fljótlega, annað hvort til að kveðja eða bara fersk með ferðasöguna og myndir í farteskinu frá París.....

Sjáið bara hvað við erum sætir saman!

2006-08-18T08:03:00.000-07:00

Vöknuð til lífsins...

2006-08-18T02:53:00.000-07:00

Jæja þá er best að fara að blogga að nýju. Ég lenti í smá vandræðum með tölvuna eða nettenginguna áður en ég fór í sumarfrí og gafst upp á bloggi í bili. En hér er ég komin að nýju og vona að þið fylgist með. Ég átti alveg eftir að setja inn myndir frá Tyrklandi og hér eru tvær af strákunum, ég set svo fleiri inn á linkinn myndirnar mínar. Þessar myndir eru teknar á ströndinni í Marmaris, en eins og sést er sandurinn frekar dökkur og mikið af smágrýti.
Hérna er Kristófer að byggja kastala:

Þorgeir Sölvi var meira í því að safna steinum og ganga um...en hann hafði líka mikla ánægju af því að eyðileggja kastalann hans Kristófers!

Það eru spennandi tímar framundan, eftir viku förum við Kjartan í rómantíska ferð til Parísar yfir helgi og kíkjum á Madonnu tónleika á sunnudeginum!
A dream come true...
Ég keypti mér nýjasta diskinn hennar í tilefni af þessum tímamótum og mæli hiklaust með honum. En þið heyrið frá mér fljótlega og nú ætla ég að reyna að skrifa reglulega...ok???
Hafið það gott.
Í sveitinni hjá langömmu núna í ágúst:

Tyrkland á morgun!

2006-06-26T09:50:00.000-07:00

Útskrift og utanferð

2006-06-22T07:06:00.000-07:00

Já þá fer að styttast í útskriftina, byrjar klukkan 14 á laugardaginn, en ég verð að vera mætt klukkan 12:30.
Á síðustu metrunum ákvað ég að sleppa því að hafa útskriftarveislu að sinni, en ég mun að sjálfsögðu hafa kaffiboð fyrir alla síðar í sumar þótt það verði ekki allir saman.
Á þriðjudaginn förum við til Tyrklands og hlökkum við að sjálfsögðu mikið til. Það verður auðvitað mikil eftirsjá að hafa ekki svona góða fylgdaraðila eins og í fyrra þegar Heiða, Toggi og Ísey mættu til að skemmta sér með okkur seinni vikuna, en ég er viss um að við finnum eitthvað út úr þessu. Marmaris kunn vera þekkt fyrir einstaka gestrisni og góðan mat.
Við verðum tvær vikur í sólinni og svo skulum við tala saman þegar við komum heim, vonandi vel afslöppuð...en ég efast um að það verði mikið slappað af með tvo fjörkálfa. Bara stuð!

Laugardaginn var fórum við Kjartan í brúðkaup hjá Brynju og Andreasi, það var ofboðslega vel heppnað og skemmtilegt.
Hér er ein mynd úr brúðkaupinu:

En ég læt kannski heyra í mér eftir útskriftina, hvort ég hafi dottið á sviðinu og svona. Hafið það gott um helgina!

I did it!

2006-06-09T04:38:00.000-07:00

Já loksins get ég samviskusamlega farið að eyða tímanum í athafnir eins og að blogga, horfa á ruslefni í sjónvarpinu og bara að gera ekki neitt. Ég er auðvitað
í sumarfríi og vann heldur betur til þess....ég semsagt náði að klára ritgerðina mína fyrir þá sem það ekki vita. Útskriftin mín er 24. júní og ég er voða stolt.
Að vísu verða margir fjarverandi sem ég hefði viljað hafa í útskriftinni minni (eins og elsku Sigga og Gummi), en svona er þetta bara.
Svo er ég búin að fá inngöngu í mastersnám í blaða-og fréttamennsku í Háskólanum í haust þannig að píslargöngu minni er langt frá því að vera lokið!

Kóngsins Köbenhavn

2006-04-18T08:22:00.000-07:00

Útsýni frá efstu hæðinni á Mariott hótelinu, eða the Executive floor sem er á 11 hæð. The Demon...scary rússíbani sem við Kjartan drifum okkur bæði í!! Geðveikt gaman.
Einhvers konar krani á floti. Ferlega spes.
Guðbjörg í tívólí.
Kjartan í tívólí.

Skírn Þorgeirs Sölva 13. apríl 2006

2006-04-13T20:32:00.000-07:00

Jæja þá er búið að skíra litla guttann.

Það er von á fleiri myndum bráðlega en það gengur eitthvað illa að hlaða inn núna.
Þetta var ofboðslega góður dagur og allt gekk ljómandi vel bara.
Stubbarnir voru ekkert smá flottir í smókingunum sínum...
Klukkan er hálffjögur svo það er best ég fari að sofa svo ég óska ykkur góðrar
nætur...og gleðilega páska!!

Herbergisþjónusta á næsta leiti...

2006-04-11T10:59:00.000-07:00

Sæl og blessuð öll sömul.
Eins og ég var dugleg í gærkvöldi og fyrradag þá fór dagurinn í dag í eiginlega ekki neitt. En þetta kemur allt, það er ég viss um.
Á fimmtudaginn klukkan eitt verður ástin mín hann Þorgeir Sölvi skírður í Bessastaðakirkju og mig hlakkar rosalega til að sjá þá bræðurna í nýju
fötunum sínum.

Á laugardagsmorgun förum við Kjartan svo í helgarfrí til Köben og fáum okkur roomservice á sunnudagsmorguninn áður en við rennum aftur til Íslands...

Mánudagur er byrjunin á einhverju góðu

2006-04-10T15:27:00.000-07:00

Sæl veriði öllsömul. Ég er að komast í svaka stuð. Að vísu á ég eftir að finna aðeins meira efni um Puerto Ríkó og fræðilega hlutann í ritgerðina og það veldur mér smá kvíða, en þetta er allt að koma. Ég er að klára að setja viðtölin inn í tölvuna, á bara eitt eftir og ég finn strax að það er ýmislegt sem ég get nýtt mér úr þeim, þótt ætíð sé hægt að gera mun betur eftir á eins og við vitum nú öll.
Helgin var fín, lærði bara slatta og er að minnka ísskáps túrana og net notkunina mikið. Ég stóð mig ekkert í Herbalífinu, ég fann frá fyrsta degi að ég varð bara alltof svöng og þegar maður er að læra og svoleiðis þá þýðir ekkert að vera svangur. Ok, fyrir fólk sem hefur engan aga. En lítið á björtu hliðarnar, það eru ekki miklar líkur á því að ég látist úr anorexíu.
En ég er bara að heilsa og svo var ég farin að skammast mín fyrir að hafa nektarmynd af Kjartani fremst á síðunni svo ég ákvað að hafa einhvern texta fyrst...en ég tími ekki að taka hana út. Algert augnakonfekt...
Hafiði gott mánudagskvöld og enn betri þriðjudagsnótt!!!